E fundit!

13:19 Kronika

Viktima e dytë nga mot i keq/ Mbytet peshkatari në Ksamil

Shtetasi M.H 61-vjeç, peshkatar është gjetur i pajetë në a...

Lajm i mirë për Silvinjon, rikuperohet sulmuesi i Kombëtares. Gati për eliminatoret

16 Shkurt 2025, 18:48, Sport CNA

Lajm i mirë për Silvinjon, rikuperohet sulmuesi i Kombëtares.

Në një kohë kur përflitet për dëmtime të shumta, trajneri i Shqipërisë, Silvinjo ka marrë një lajm të mirë nga Rusia. Mirlind Daku, ka lënë pas problemet dhe është rikthyer në fushë, duke sjellë qetësi për stafin teknik të kuqezinjve.

Pas disa ditësh pasigurie për gjendjen e tij fizike, Daku u aktivizua në miqësoren e fundit të Rubin Kazanit, e cila u zhvillua në Antalia të Turqisë kundër përfaqësueses së Koresë së Veriut. Sulmuesi shqiptar kishte pësuar një dëmtim në ndeshjen përgatitore të mëparshme kundër Nefçi Baku, por fatmirësisht, ndrydhja e kaviljes nuk rezultoi një problem i madh.

Trajneri i Rubin Kazanit, Rashid Rahimov, e aktivizoi 26-vjeçarin në këtë takim, duke treguar se Daku është gati për të vijuar sezonin. Pavarësisht se nuk arriti të shënojë, fakti që luajti një pjesë të mirë të ndeshjes konfirmon se dëmtimi i tij nuk ka lënë pasoja serioze. Megjithatë, Rubin Kazani nuk e pati një ditë të mirë në fushë, duke u mposhtur 1-4 nga skuadra e Koresë së Veriut.

Shpresohet që Daku të mos ketë më shqetësime fizike, teksa Rubin Kazani ka në plan edhe dy miqësore të tjera në Antalia përpara se të rinisë sezoni zyrtar në Premier Ligën ruse. Sfida e parë e kampionatit për klubin e tij do të zhvillohet më 1 mars kundër Ahmat Groznit, një duel i rëndësishëm për të përcaktuar objektivat e skuadrës në pjesën e mbetur të sezonit.

Në aspektin personal, sulmuesi shqiptar ka pasur një ecuri shumë pozitive këtë sezon, duke shënuar 9 gola dhe 5 asistime në 17 ndeshjet e para të kampionatit rus. Performanca e tij ka tërhequr vëmendjen e disa klubeve, por për momentin, ai do të vazhdojë të jetë pjesë e Rubin Kazanit deri në fund të sezonit, kur edhe i përfundon kontrata.

Edhe pse Daku është një lojtar kyç për Rubin Kazanin, trajneri Rahimov ka pranuar në një intervistë për televizionin Maç se do të jetë e vështirë ta mbajnë gjatë në skuadër. Me formën e tij të shkëlqyer dhe me interesin në rritje nga klube të tjera, është e mundur që ai të largohet në verë nëse nuk arrihet një marrëveshje për rinovimin e kontratës.

Për momentin, fokusi i Dakut mbetet te rikuperimi i plotë dhe ndihma që mund t’i japë skuadrës së tij në pjesën e mbetur të sezonit. Por, në të njëjtën kohë, ky është një zhvillim pozitiv edhe për Kombëtaren Shqiptare, e cila ka nevojë për opsione të plota në repartin e sulmit në prag të angazhimeve të ardhshme ndërkombëtare.