Italia kërkon vendin e parë, Gattuso publikon listën

7 Nëntor 2025, 15:14, Sport CNA

Kombëtarja italiane po përgatitet për dy ndeshjet e fundit në grupin e kualifikueseve për Kupën e Botës. Skuadra e drejtuar nga trajneri Gennaro Gattuso do të përballet fillimisht me Moldavinë në transfertë, të enjten më 13 nëntor, dhe më pas do të mbyllë ciklin kualifikues të dielën më 16 nëntor në Milano, ndaj Norvegjisë. Këto dy sfida janë të rëndësishme jo vetëm për ruajtjen e ritmit pozitiv, por edhe për mundësinë, që Italia të arrijë vendin e parë në grup.

Pas nisjes së vështirë, me humbjen në Oslo ndaj Norvegjisë, të kaltërit kanë reaguar me pesë fitore radhazi, duke siguruar me dy ndeshje përpara pjesëmarrjen në fazën “play-off” të Botërorit.

Aktualisht, Italia renditet pas Norvegjisë, e cila ka një diferencë golash shumë më të lartë: +26 kundrejt +10 të skuadrës së Gattusos. Për ta parakaluar rivalen nordike, Italia duhet jo vetëm të fitojë të dyja ndeshjet e saj, por edhe të shpresojë në një ndalesë të Norvegjisë në takimin e saj të 13 nëntorit kundër Estonisë.

Trajneri Gattuso ka bërë publike listën e grumbullimeve për fazën përgatitore që nis më 10 nëntor në qendrën stërvitore të Coverciano-s. Në listë përfshihen 27 lojtarë, me disa risi dhe rikthime të rëndësishme. Portieri i Cagliarit, Elia Caprile, merr për herë të parë ftesën në kombëtaren e parë, ndërsa Alessandro Buongiorno dhe Samuele Ricci rikthehen pas disa muajsh mungesë, përkatësisht nga marsi dhe qershori i këtij viti. Një tjetër rikthim është ai i Gianluca Scamacca-s, që kishte qenë pjesë e grumbullimit të shtatorit, por ishte detyruar të largohej për shkak të një shqetësimi fizik.

Në listën e Gattusos vërehen edhe disa mungesa për arsye disiplinore. Mesfushori Nicolo Barella do të mungojë në ndeshjen e parë kundër Moldavisë, pasi është i pezulluar për shkak kartonësh.

LISTA E PLOTË:

Portierë: Elia Caprile (Cagliari), Marco Carnesecchi (Atalanta), Gianluigi Donnarumma (Manchester City), Guglielmo Vicario (Tottenham);

Mbrojtësit: Alessandro Bastoni (Inter), Raoul Bellanova (Atalanta), Alessandro Buongiorno (Napoli), Riccardo Calafiori (Arsenal), Andrea Cambiaso (Juventus), Giovanni Di Lorenzo (Napoli), Federico Dimarco (Inter), Matteo Gabbia (Milan), Gianluca Mancini (Roma);

Mesfushorët: Nicolò Barella (Inter), Bryan Cristante (Roma), Davide Frattesi (Inter), Manuel Locatelli (Juventus), Samuele Ricci (Milan), Sandro Tonali (Newcastle);

Sulmuesit: Francesco Pio Esposito (Inter), Moise Kean (Fiorentina), Riccardo Orsolini (Bologna), Matteo Politano (Napoli), Giacomo Raspadori (Atletico Madrid), Mateo Retegui (Al-Qadsiah), Gianluca Scamacca (Atalanta), Mattia Zaccagni (Lazio).