Procesi i vaksinimit/ Manastirliu: Duhet në të njëjtën kohë për gripin dhe COVID-19

27 Tetor 2022, 12:07, Shëndeti CNA

Procesi i vaksinimit/ Manastirliu: Duhet në të njëjtën

Konfirmohen rastet e para me virusin e gripit, teksa 270 mijë doza vaksinë kundër gripit kanë mbërritur. Nga nëntori vijnë dozat e adaptuara të vaksinës kundër COVID-19.

Ka nisur sot vaksinimi falas kundër gripit stinor, i cili do të kombinohet njëherësh me vaksinën përforcuese kundër COVID-19 në qendrat shëndetësore në të gjithë vendin.
Ministrja e Shëndetësisë dhe Mbrojtjes Sociale, Ogerta Manastirliu, nga Qendra Shëndetësore nr. 8 në kryeqytet, tha se kemi siguruar vaksinën kundër gripit për grupet e rrezikuara.

“270 mijë doza të vaksinave kundër gripit tashmë kanë mbërritur dhe po shpërndahen në gjithë qendrat shëndetësore anembanë vendit. Fokusi për vaksinimin kundër gripit është tek ata të cilët kanë problematika shëndetësore, te të moshuarit mbi 60 vjeç, te punonjësit shëndetësore, te forcat e rendit, tek edukatoret, te mësuesit, për të garantuar që të mos kemi problematika të formave të rënda që vijnë pikërisht nga gripi sezonal”, tha Manastirliu.
Duke iu referuar rekomandimeve të Organizatës Botërore të Shëndetësisë dhe Institutit të Shëndetit Publik, Manastirliu tha se duhet të kryhet në të njëjtën kohë vaksinimi kundër gripit dhe COVID-19.

“Duke qenë se tashmë janë kapur rastet e para me grip në vendin tonë, është e rëndësishme për të filluar me intensitet këtë fushatë vaksinimi që edhe pse do të jetë një fushatë e kombinuar vaksinimi, të vaksinave të gripit dhe atyre kundër COVID-19, të ketë një përqasje të mirë në komunitet dhe të lajmërohen të gjithë grupet e riskut nëpërmjet mjekëve të familjes dhe nëpërmjet strukturave tona të shëndetësisë. Ajo çfarë rekomandohet nga ekspertët dhe çfarë rekomandohet nga Organizata Botërore e Shëndetësisë dhe nga institucionet ndërkombëtare që merren me shëndetin publik, por edhe udhëzimi i Institutit të Shëndetit Publik, është pikërisht që në momentin që do të aplikohen te këto grupe vaksinat kundër gripit, aplikohet paralelisht edhe vaksina kundër COVID-it, qoftë për sa u përket dozave bazale, pra dozave të para dhe të dyta për ata që ende nuk e kanë kryer, por edhe për dozat booster apo ato përforcuese dozave të treta, dozat e katërta”, u shpreh Manastirliu.

Përpos vaksinave të gripit, pas amendimit të marrëveshjes me kompaninë Pfizer, Shqipëria do të sigurojë rreth 700 mijë doza të vaksinave të adaptuara kundër COVID-19, të cilat përfshijnë dhe nënvariantet e reja./CNA.al