web counter
LEXO PA REKLAMA!

SHKARKO APP

App Store
Google Play

“Mos humbni vigjilencën”/ Eugena Tomini: Si ta dalloni COVID-19 nga lia e majmunëve

11 Qershor 2022, 21:05, Shëndeti CNA
“Mos humbni vigjilencën”/ Eugena Tomini: Si ta dalloni COVID-19
Drejtoresha e Institutit për Shëndetin Publik, Eugena Tomini

Drejtoresha e Institutit për Shëndetin Publik, Eugena Tomini, ka folur për pandeminë e COVID-19, e cila duket se po shkon drejt shuarjes dhe për linë e majmunëve.

Tomini tha se ISHP e ka kapacitetin laboratorik dhe njerëzor për të arritur që të ekzaminojë të gjitha sëmundjet infektive, por edhe respiratore, të stinës së verës.

Përsa i përket COVID-19, ajo deklaroi se alerti nuk duhet të mënjanohet dhe vëmendja nuk duhet ulur, sepse turizmi do të jetë në pikun e vet.

“Kemi të njëjtat nivele testimi me Bullgarinë, Kosovën apo Slloveninë në 100-150 testime për 1 milion banorë. Alerti nuk duhet të mënjanohet, sepse turizmi do të jetë në pikun e vet. Do të kemi lëvizshmëri të turistëve. Pavarësisht se duket një moment shpërqendrimi nuk duhet të ulet vigjilenca. COVID-i ende merr jetë njerëzish, pavarësisht se kemi incidencë të ulët. Sigurisht aktualisht është një fluks tepër i ulët, por kontakti i drejtpërdrejte me mjekun e familjes, që ka të gjithë kapacitetin për kryerjen e testimeve, e ka ulur fluksin te 127”, u shpreh Tomini në emisionin “Kjo Javë”.

Më tej, ajo tregoi se si mund ta dallojnë qytetarët nëse janë të prekur nga lia e majmunëve apo koronavirusi, duke qenë se edhe në disa raste COVID-19 është shoqëruar me puçrra.

“Alergjitë nga medikamentet, fenomenet e rashit apo daljes së pikave të vogla në lëkurë, mund të shfaqen edhe nga gjendja virale, përdorimi i paracetamolit ose aspirinës, por edhe virozat e tjera respiratore të sezonit. Por kontakti me mjekun e familjes bën diferencën, pasi testimi sjell gatishmërinë ndaj sëmundjeve që shoqërohen me rash apo temperaturë”, theksoi drejtoresha e ISHP-së/ B.A. – CNA.al





Lajmet e fundit nga