web counter
LEXO PA REKLAMA!

SHKARKO APP

App Store
Google Play

E fundit!

x

U përplasën në Kuvend/ Sula akuza Çollakut: Po u shërben Ramës e mazhorancës

10 Nëntor 2023, 14:32, Politikë CNA
U përplasën në Kuvend/ Sula akuza Çollakut: Po u
Deputeti i Partisë Demokratike, Dashnor Sula

Deputeti i Partisë Demokratike, Dashnor Sula, ka hedhur akuza ndaj deputetit të Lulzim Bashës, Kreshnik Çollakut, pas përplasjes në Kuvend.

Me anë të një reagimi për mediat, Sula thotë se Çollaku se po i shërben mazhorancës socialiste duke plotësuar kuorumin për mbajtjen e Komisionit parlamentar, në një kohë kur e gjithë opozita është në protestë dhe duhet të mbështesë kërkesat e saj legjitime.

“Sot në ndihmë të arrogancës së mazhorancës, për të plotësuar qëllimet e PS për normalitet parlamentar u vetofrua edhe një koleg deputet i djathtë. Që në nisje të Komisionit të Integrimit Evropian ia bëra të qartë kolegut duke iu drejtuar në konfidencë në emër që po plotëson kuorumin dhe po i shërben Partisë Socialiste. Por si përgjigje mora sharje dhe sjellje shpifëse nga i njëjti koleg që nga një foltore u viktimizua dhe foli për dhunë, njëlloj si Erjon Braçe apo të tjerë socialistë. Nuk jam marrë dhe nuk merrem me asnjë deputet të opozitës, por viktimizimin e rremë nuk mund ta pranoj dot. As keqpërdorimin nga mazhoranca nuk mund ta tolerojmë.

Provokimi i kolegëve opozitarë, duke u bashkuar me deputetët socialistë për t'i bërë kuorumin e mbledhjes, është akti më i shëmtuar i dikujt që është në Kuvend me votat e opozitarëve. Në vend që të bashkohet me deputetët e opozitës për të drejtat kushtetuese të opozitës, i bashkohet korit të rremë të socialistëve për dhunë imagjinare, që as ka ndodhur dhe as nuk do të ndodhë. Aksioni i opozitës në Kuvend po shërben edhe për të ndarë njëherë e përgjithmonë deputetët e opozitës dhe deputetët proqeveritarë me mandat opozitari! Beteja për të drejtat kushtetuese të opozitës duhet të bënte bashkë çdo deputet të PD, por disa kanë zgjedhur të jenë në Kuvend ose për të bërë kuorumin e mbledhjeve ose për të shprehur gadishmërinë për të votuar ligjet e Edi Ramës. Zgjedhje e tyre, e respektoj, por të paktën të mos shpifin për dhunë e të mos bëjnë moral!”, shprehet ai.

Më tej, deputeti demokrat deklaron se prej më shumë se dy muajsh Grupi Parlamentar i Partisë Demokratike, po kërkon me insistim mbajtjen e Komisioneve Hetimore dhe Reformën zgjedhore, ndërsa mazhoranca po luan çdo kartë të mundshme për të penguar zbatimin e kërkesave të demokratëve.

“Grupi Parlamentar i Partisë Demokratike prej dy muajsh kërkon me insistim në Parlament një të drejtë kushtetuese të mohuar në dhunim të kushtetutës nga mazhoranca, sa i përket kërkesës për Komisionet Hetimore dhe Reformën Zgjedhore. Me bindje të plotë se qytetarëve u janë cenuar të dhënat personale dhe se janë fshirë fakte të lidhjeve kriminale të pushtetarëve, kërkojmë Komision hetimor për fshirjen e të dhënave të TIMS për ta provuar këtë gjë. Të bindur se në aferën e madhe të sterilizimit dhe check-up janë vjedhur miliona euro të qytetarëve, kërkojmë hetim parlamentar për përfshirjen e pushtetarëve dhe ndaljen e abuzimeve.

Fondet e AZHBR kanë shqetesuar edhe Bashkimin Evropian por PS na e mohon të drejtën per te provuar abuzimet përmes Komisionit Hetimor. Tenderët janë dhënë në shkelje të ligjeve të vendit duke u shkaktuar dëm ekonomik qytetarëve, në kushtet e konfliktit të interesit dhe të paracaktuara. Edhe për këtë kërkojmë hetim parlamentar, por në shkelje të rregulloreve dhe Kushtetutës edhe kjo na mohohet. Kërkojmë të dëgjohemi për Reformën Zgjedhore, por sërish në shkelje të rregulloreve dhe ligjeve mazhoranca kërkon të zgjedhë vetë opozitën, ta emërojë ajo atë. Këto kërkesa të drejta duhet të mbështeten nga çdo deputet opozitar”, thekson Sula.

Më herët, Çollaku reagoi duke thënë se nuk ka frikë nga askush dhe se ka kaluar mjaftueshëm sfida.

Kësaj ngjarjeje nuk i shpëtoi pa një reagim as Sali Berisha, i cili e quajti provokim të ulët sjelljen e Çollakut karshi kolegëve demokratë që janë në protestë prej disa javësh./ CNA





Lajmet e fundit nga