“Tri rrugë me çmime të ndryshme”/ Blushi, thirrje organeve të drejtësisë: Të nisin hetimet, Veliaj po vjedh

1 Maj 2023, 12:01, Politikë CNA

“Tri rrugë me çmime të ndryshme”/ Blushi, thirrje

Sekretari i Përgjithshëm i Partisë së Lirisë, Tedi Blushi

Sekretari i Përgjithshëm i Partisë së Lirisë, Tedi Blushi, në një deklaratë për mediat ka denoncuar kreun e Bashkisë, Erion Veliajn, duke thënë se po vjedh qytetarët përmes asfaltit elektoral.

Blushi shprehet se një distancë të shkurtër, në tri rrugë që ndodhen në të njëjtën zonë dhe në të njëjtin terren, kemi tri çmime të ndryshme për metër të asfaltit elektoral.

Ai u ka bërë thirrje organeve të drejtësisë që të nisin hetimet pasi Veliaj po vjedh paturpësisht taksat e qytetarëve.

“Si është e mundur që brenda një distance kaq të shkurtër, në tri rrugë që ndodhen në të njëjtën zonë dhe në të njëjtin terren, kemi tri çmime të ndryshme për metër të asfaltit elektoral?!

Në rrugën “Nikolla Tupe”, 1 metër asfalt elektoral koston 19,994 lekë. Në rrugën mbrapa shkollës “Edit Durham”, metri i asfaltit elektoral koston 25,103 lekë.

Ndërsa në rrugën “Beqir Rusi”, 1 metër asfalt elektoral koston 29,315 lekë.

Si shpjegohet që njëra rrugë kushton gati 40% më shtrenjtë se rruga tjetër, ndërkohë që kemi të njëjtën cilësi asfalti dhe të njëjtin objekt punimesh?

Arsyeja është shumë e thjeshtë, vjedhja dhe abuzimi me taksat e qytetarëve të Tiranës, nga kryetari ende në detyrë i bashkisë, Erion Veliaj.

Ky 40% në fakt nuk është gjë tjetër vetëm korrupsion, lekë të grabitura të qytetarëve të Tiranës, që përfundojnë në xhepat e Erion Veliajt dhe kompanive pranë tij, në funksion të zgjedhjeve.

Kapja në flagrancë duhet t’i mjaftojnë organeve të drejtësisë për të nisur menjëherë hetimet dhe nxjerrjen e përgjegjësisë ligjore për këdo që vazhdon vjedh paturpësisht.

Erion Veliaj nuk pati kohë në tetë vite të ndërtonte një infrastrukturë rrugore dinjitoze për Tiranën!

Me rreth 1 miliard euro buxhet, ai mund të shtronte edhe rrugët e Parisit, por fokusi i tij ishin lejet e ndërtimit dhe vjedhja me megaaferën e inceneratorit të Tiranës, që nuk ekziston.

Rrugët nuk u shtruan sepse taksat e qytetarëve u vodhën dhe u shpërdoruan!

Me ziftin elektoral që po hidhet tani me nxitim, Erion Veliaj nuk e zbardh dot faqen!

Përkundrazi, po e nxin edhe më shumë duke abuzuar edhe në ditët e fundit të detyrës me taksat e qytetarëve të Tiranës.

Ndaj Ndryshimi është në dorën tuaj më 14 maj, duke votuar për Belind Këlliçin dhe për një Këshill të ri Bashkiak, që nuk do të lejojë më këto lloj standarde punimesh dhe abuzim me taksat tuaja”, tha Tedi Blushi./ CNA.al