Konferenca e Kryetarëve/ Këlliçi: Mazhoranca kërkoi kohë për të paraqitur tekst alternativ për kërkesat tona

17 Tetor 2025, 13:47, Politikë CNA

Konferenca e Kryetarëve/ Këlliçi: Mazhoranca kërkoi

Nënkryetari i grupit parlamentar të PD-së, Belind Këlliçi, ka dhënë një deklaratë për mediat pas mbledhjes së Konferencës së Kryetarëve. Këlliçi u shpreh se mazhoranca po tenton të ndalojë opozitën të diskutojë në Kuvend lidhur me çështjet dhe problemet kryesore të qytetarëve.

“Mos harroni se në seancën e dytë ndodhi i njëjti skenar për të ndaluar opozitën të fliste për çështjet kryesore dhe problemet e drejtësisë. I njëjti skenar për të parandaluar opozitën, ndodhi dje në Kuvend, sapo erdhi momenti të diskutohej ligji më kryesor për vendin në këto 4 vite, ai i mbetjeve.

Ne jemi të qartë për tentativën e kësaj mazhorance dhe kryetarit të Kuvendit për të pamundësuar deputetët e opozitës që së seancën e ardhshme në datën 27, t'u drejtojnë pyetje drejtuesve të institucioneve të drejtësisë, dje patëm një tentativë për të modifikuar mënyrën se si drejtohen pyetje. Për këtë arsye unë u kam paraqitur Peleshit dhe Ballës katër modele të parlamenteve europiane se si drejtohen pyetje në seancë”, tha Këlliçi.

Ndërkohë lidhur me tri kërkesat e opozitës që u diskutuan sot në mbledhjen e Konferencës së Kryetarëve, deputeti i PD-së tha se mazhoranca kërkoi kohë për ndryshimet dhe vendimmarrjen e grupit të tyre parlamentar lidhur me ngritjen e komisionit hetimor për çështjen “McGonigal”, komisionit hetimor për zgjedhjet e 11 majit dhe mocionin me debat për Onkologjikun.

“Për ngritjen e Komisionit hetimor për 'McGonigal', mazhoranca kishte një mendim ndryshe për një tekst alternativ, ndryshe nga PD. Ne do të presim tekstin e tyre alternativ për t'u dorëzuar pranë Kuvendit për të parë ndryshimet që ata propozojnë lidhur me kërkesën tonë. Për herë të parë u publikua në media një foto e Ramës me McGonigal në 2017.

Së bashku me kërkesën për ngritjen e komisionit hetimor për zgjedhjet e 11 majit, është rënë dakord të kalojë në seancën e datës 30 tetor. Ne kemi depozituar kërkesat tona, dhe mazhoranca ka rënë dakord të sjellë ndryshimet që ata propozojnë. Nuk pati asnjë debat dhe pritet a do të vijnë me një tekst alternativ mazhoranca.

Për mocionin me debat për Onkologjikun edhe kjo nuk ka marrë vendim final nga mazhoranca, të cilët kërkuan më shumë kohë, deri të hënën nga kreu i grupit të PS-së. Kemi kërkuar mocionin me debat për një situatë kaq të rëndë dhe të ndjeshme për qytetarët. Kjo është çështje përtej partive politike. Kështu për kerkesën e tretë është kërkuar më shumë kohë nga PS për vendimmarrje", tha Këlliçi. /CNA