web counter
LEXO PA REKLAMA!

SHKARKO APP

App Store
Google Play

E fundit!

x

Reforma zgjedhore/ Celibashi: Problematikë, çështja e votuesve që nuk ushtrojnë dot të drejtën e votës

21 Tetor 2025, 10:42, Politikë CNA

Reforma zgjedhore/ Celibashi: Problematikë, çështja e votuesve

Komisioneri Shtetëror i Zgjedhjeve, Ilirjan Celibashi, ka qenë i pranishëm në konferencën "30 vite partneritet dhe përparim - Shqipëria, Këshilli i Europës dhe Komisioni i Venecias".

Gjatë fjalës së tij, Celibashi u ndal te reforma zgjedhore, ku paraqiti disa nga çështjet kryesore që duhet të adresohen në kuadër të kësaj reforme. Kreu i KQZ-së tha se një problematikë është pamundësia për të votuar e atyre personave që gëzojnë të drejtën e votës, ku përfshihen personat që nuk mund të dalin nga banesa për arsye shëndetësore.

Kjo çështje, tha Celibashi, duhet të marrë zgjidhje. Celibashi u shpreh një tjetër kategori që nuk mund të ushtrojë të drejtën e votës dhe që duhet t’i mundësohet, janë funksionarët që në ditën e zgjedhjeve janë në detyrë, si policët apo media.

Po ashtu, drejtuesi i KQZ-së foli edhe për fushatën zgjedhore, ku tha se duhen rishikuar rregullat dhe të shtohet në Kodin e ri Zgjedhor dhe fushata në rrjetet sociale pasi në atë aktualin nuk përfshihet.

 

“Qoftë mazhoranca më së shumti, edhe opozita, duhet të bëjnë të gjitha përpjekjet për të pasur ndryshimet e dakordësuara, sa më shpejt të jetë e mundur. Nëse reforma zgjedhore do të vazhdojë të shtyhet në kalendat greke dhe ndryshimet e Kodit Zgjedhor do të shtyhen 1 vit apo 6 muaj përpara zgjedhjeve parlamentare, do të jemi në të njëjtën situatë si sot, dikush do të fitojë e të tjerët do të kontestojnë.

Një listë të çështjeve që duhet të adresohen në kuadër të reformës zgjedhore:

-Mënyrën e organizimit të komisioneve të niveleve të dyta dhe të treta.

-Të rikonsiderohen rregullat që kanë të bëjnë me organizimin dhe drejtimin e partive politike. Veçanërisht financimin e tyre. Do të shohim çfarë mund të bëjmë me financimin e palëve të treta.

-Rregullat për fushatën zgjedhore. Në kodin aktual nuk ka asgjë për fushatën në rrjetet sociale.

-Mënyra e votimit. Duhet të vendosim çfarë do të bëjmë me votimin elektronik, ta zgjerojmë apo jo.

-Rregullat mbi ankimet zgjedhore kanë nevojë të rishikohen në mënyrë radikale.

-Organizimi dhe funksionimi i KQZ-së. Partitë politike të vendosin një mënyrë për këtë. Nëse mbajmë këtë formulë duhet ristrukturuar organizimi dhe strukturimi. KQZ gëzon reputacionin si një institucion që nuk është nën kontrollin e mazhorancës.

-Çështja e votuesve që kanë të drejtën, por nuk mund të ushtrojnë këtë të drejtë, për arsye objektive, si arsye shëndetësore. Është një kategori tjetër e funksionarëve që nuk mund të ushtrojnë të drejtën e tyre, si efektivët e policisë apo mediat.

-Rregullat për referendumet. Ne nuk bëjmë dot referendume.

-Shpalljen e rezultateve”, deklaroi Celibashi./CNA





Lajmet e fundit nga