Qeveria miraton shpalljen e Zonës së Teknologjisë dhe Zhvillimit Ekonomik në Xhafzotaj të Shijakut

8 Maj 2025, 08:03, Politikë CNA

Qeveria miraton shpalljen e Zonës së Teknologjisë dhe Zhvillimit

Qeveria shqiptare, nëpërmjet një Vendimi të Këshillit të Ministrave, ka shpallur “Zonë të teknologjisë dhe zhvillimit ekonomik” në Xhafzotaj të Shijakut. Vendimi u mor në mbështetje të nenit 100 të Kushtetutës dhe të nenit 4, të ligjit nr.9789, datë 19.7.2007, “Për krijimin dhe funksionimin e zonave të teknologjisë dhe zhvillimit ekonomik”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave.

V E N D O S I:

1. Shpalljen “Zonë e teknologjisë dhe zhvillimit ekonomik” të territorit me sipërfaqe 135 215 (njëqind e tridhjetë e pesë mijë e dyqind e pesëmbëdhjetë) m2 dhe sipërfaqe ndërtimore 53 022.3 (pesëdhjetë e tre mijë e njëzet e dy pikë tre) m2, pjesë e zonës kadastrale 3852, në Xhafzotaj, Shijak, të përbërë nga parcelat me numrat e pasurive dhe sipërfaqet përkatëse, sipas listës dhe genplanit që i bashkëlidhen këtij vendimi.

2. Shtrirja, kufijtë, pikat e hyrjes dhe të daljes në “Zonën e teknologjisë dhe zhvillimit ekonomik” përcaktohen në genplanin që i bashkëlidhet këtij vendimi.

3. Veprimtaritë, që do të zhvillohen në “Zonën e teknologjisë dhe zhvillimit ekonomik”, janë të llojit:

a) industri prodhuese;

b) industri e automjeteve dhe pjesëve të këmbimit;

c) industri e teknologjisë së informacionit dhe komunikimit (ICT);

ç) industri e pajisjeve elektrike dhe elektronike;

d) industri e produkteve të energjisë;

dh) industri e rëndë;

e) industri e lehtë dhe agropërpunuese;

ë) përpunim dhe magazinim mallrash;

f) tregtare dhe eksport-import;

g) shërbime;

gj) industri të tjera, në përputhje me legjislacionin shqiptar.

4. Periudha e funksionimit të zonës është 35 (tridhjetë e pesë) vjet, me të drejtë përsëritjeje deri në 99 (nëntëdhjetë e nëntë) vjet.

5. Ministria përgjegjëse për ekonominë vë në dispozicion, në funksion të zhvillimit të projektit, pasuritë e paluajtshme të llojit “arë”, të ndodhura në zonën kadastrale 3852, në Xhafzotaj, Durrës, me numra pasurie 345/55 (sipërfaqe totale 293 m2), 345/60 (sipërfaqe totale 367 m2) dhe 345/62 (sipërfaqe totale 760 m2), pjesë të zonës së teknologjisë dhe zhvillimit ekonomik, me sipërfaqe totale 1 420 (një mijë e katërqind e njëzet m2), sipas legjislacionit në fuqi.

6. Zhvillues i “Zonës së teknologjisë dhe zhvillimit ekonomik” shpallet shoqëria “VERTIGO”, sh.p.k.

7. Ngarkohen Ministria e Ekonomisë, Kulturës dhe Inovacionit, Agjencia Shtetërore e Kadastrës dhe Agjencia Shqiptare e Zhvillimit të Investimeve për zbatimin e këtij vendimi.

Ky vendim hyn në fuqi pas botimit në Fletoren zyrtare./CNA