Qëndrimet për Gjykatën Speciale/ Rama i përgjigjet Kurtit: Më paska kushtuar një çarçaf të gjatë

16 Tetor 2025, 09:55, Politikë CNA

Qëndrimet për Gjykatën Speciale/ Rama i përgjigjet Kurtit:

Kryeministri Edi Rama i është përgjigjur deklaratës së Lëvizjes Vetëvendosje lidhur me qëndrimet ndaj Gjykatës Speciale dhe organizimin e protestës në mbështetje të ish-krerëve të UÇK-së në Tiranë.

Në postimin e tij në platformën “X”, Rama shprehet se partia e kryeministrit në detyrë, Albin Kurtit, po ngatërron marrëdhëniet institucionale të Kosovës me Shqipërinë me balotazhet e zgjedhjeve komunale.

Ai shton se e ka denoncuar vazhdimisht padrejtësinë ndaj ish-presidentit të Kosovës, Hashim Thaçit, ndërsa shprehet se Vetëvendosja nuk ka bërë të njëjtën gjë.

Ndërkohë lidhur me protestën që do të mbahet nesër në Tiranë në mbështetje të ish-krerëve të UÇK-së, Rama thotë se nuk do të jetë i pranishëm. Sipas tij, vendimi për të mos marrë pjesë është për shkak se nuk do që protesta të politizohet, ndonëse e mbështet mbajtjen e saj.

Postimi i plotë i Ramës:

Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro kurse ajo paska qenë kundër Gjykatës Speciale… Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja dihet se sa ka lëvizur në atë drejtim. Por unë s’jam në asnjë lloj gare me Lëvizjen dhe më vjen keq që Lëvizja i ngatërron marrëdhëniet institucionale të Kosovës me Shqipërinë në çorbën e balotazheve komunale, ndërsa për qëndrimet e para 10 vjetëve - kur ajo nuk njihte as himnin e Kosovës e jo më pafajësinë e Hashim Thaçit, të cilin do ta donte përjetësisht në Hagë - i kujtoj Lëvizjes se Gjykata Speciale u ngrit për trafikun e organeve, jo për të marrë peng Presidentin e Republikës së Kosovës. Dhe e fundit, unë as nuk jam organizator e as nuk jam folës i protestës gjithëkombëtare “Drejtësi për Çlirimtarët”, të cilën e mbështes megjithë zemër e do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim me dashje ose jo i asaj nisme, do të dëmtonte qëllimin dhe popullaritetin e saj. /CNA

Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro kurse ajo paska qenë kundër Gjykatës Speciale… Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja… pic.twitter.com/uXCOBsYoCf
— Edi Rama (@ediramaal) October 16, 2025