Perëndimi i "Diellës" dhe shembja e rrugëve "digjitale"

25 Shkurt 2026, 14:52, Politikë Ilir Meta

Perëndimi i "Diellës" dhe shembja e rrugëve

"Diella” ishte një risi shokuese për opinionin vendas dhe ndërkombëtar.
Shumë “prekëse” ishte dhe fjala e saj në Kuvend, ku u bëri lutje skeptikëve të mos e lëndonin me paragjykimet e tyre.
Më në fund me ministren virtuale u harruan të gjitha ato raportet e nxira ndërkombëtare për vendin tonë, si lider i korrupsionit dhe ryshfetit në nivel kontinental dhe global.

Emërimi i saj ishte një shkelje e Kushtetutës, por në këtë rast qëllimi madhor e justifikonte cenimin e Kushtetutës, që është kthyer në normë në këtë vend edhe për hiçgjë.
Nuk kishte mënyrë më të mirë, më të shpejtë dhe më efikase për t’i treguar botës dhe njerëzimit se kishin çfarë të mësonin nga Shqipëria, sesa vetë shpikja e “Diellës”.

Ndaj edhe e bëri xhiron e botës duke pushtuar ballinat e mediave në çdo kontinent, diku me habi dhe diku me qesëndi.
Ndërsa përkrahësit e “Diellës” krenoheshin me këtë arritje dhe ia bënin hallall qeverisë, që i kishte dhënë AKSHI-t 1 miliard euro, “dashakeqësit” dhe “xhelozët” opozitarë merreshin me “çikërrima” si shkelja e Kushtetutës dhe ligjit apo dyshimin e “paarsyeshëm” se “Diella” ishte krijesa e Edi Ramës për të paracaktuar çdo tender dhe shmangur çdo përgjegjësi ligjore.
Por ç’t'i bësh syrit të keq, që disa celularë ranë në duar të gabuara, ku provoheshin të gjitha akuzat e Berishës, por edhe atij Ahmetajt, që në vend të bënte burgun për Partinë, zgjodhi arratinë dhe sulmet ndaj kopshtit personal (AKSHI) që krijoi “Diellën”.

Si për dreq, u zbuluan edhe disa rrëmbime të disa biznesmenëve për të vërtetuar se “pa dashje” krijuesit e “Diellës” kishin vepruar si organizatë kriminale.
Dhe si të mos mjaftonin gjithë këto mbrapshti, së fundmi na doli se ministrja antikorrupsion kishte vjedhur imazhin e një artisteje të nderuar, e cila heshti derisa ra bomba se “Diella” ishte krijesë e një organizate kriminale.
Për të mbrojtur imazhin e saj, me të drejtë, artistja ndoqi rrugën ligjore.
Kështu nisi xhiroja e dytë e “Diellës” në mbarë botën.
U habita këto ditë kur pashë se “Diella” kishte pushtuar edhe ballinën e gjigantes të spanjishtfolësve “El Pais”.
Tani edhe nga Meksika e deri përtej Argjentinës u informuan për “Diellën”.
Si të mos na mjaftonte kjo katastrofë, që na zeroi të gjitha arritjet dhe “fitoret” digjitale në nivel botëror, këto ditë na u shembën edhe të gjitha rrugët e Jug-Lindjes dhe Korridori VIII u shkurtua deri te rrethrrotullimi i Elbasanit.
Si për dreq, u shqep edhe rruga e lumit të Vlorës, atje ku kaloi vetë kreu i organizatës për në Kuç para zgjedhjeve për të bërë orakullin e 83 mandateve.

Ç’t'i bësh, syri i keq i është qepur qeverisë pa ndalim.
Pale, po edhe pista e “Formula Uno” u shkul si prej kartoni në Elbasan, ndërsa lideri global e inicioi jo vetëm për t’u zgjidhur hallet elbasanasve, që janë të dytët pas Kukësit për nivelin e varfërisë, por edhe për t’u treguar atyre të Abu Dabit, se nuk janë të pakonkurrueshëm.
Ndërkohë m’u kujtua paralajmërimi publik që dhashë në Shkodër më 10 shkurt 2024, për rrezikun e shembjes së rrugës Korçë-Ersekë.

Pak ditë më pas erdhi një mesazh se ishte shembur rruga vërtet.
Nuk m’u besua dhe shkova në vend për ta parë. Një skenë gjigante krimi.
Në një gjatësi prej mbi 200 metrash, rruga ishte shembur përdhe dhe kudo shikoje vetëm zhavorr, por edhe një cipë asfalt.
M’u kujtua se vetëm para tri javësh kisha kaluar mbi atë rrugë duke bërë vetë shoferin pas shumë vitesh.
Miri, një kolonjar i thekur, ishte pasagjer atë ditë.
Sapo hymë në rrugën e re të Ersekës, u lumturuam se më në fund kjo trevë aq e bukur dhe me aq histori po shpëtonte nga izolimi.

Kur papritur makina filloi të dridhej.
“Ore Miri, çfarë i ke bërë makinës, se po dridhet?”, - e pyes unë.
“Makina është në rregull shef, - tha Miri, - por shiko çfarë i kanë bërë këta rrugës”.
Kështu është kur projektet e rrugëve bëhen me Google Maps nga zyra dhe supervizioni nga Tirana.
Dhe meqenëse ra fjala, që Korridori VIII ka mbetur te rrethrrotullimi i Elbasanit, kjo është e qartë, por a di dikush të thotë se ku fillon ky Korridor strategjik në vendin tonë? Te kullat e Alabbarit në Porto Romano, tek Eco-Park në Spitallë apo te Durana Park?