Pakt Rama-Basha/ Në listën për deputetë shfaqen emra të lidhur me “21 Janarin”

13 Mars 2025, 16:37, Politikë CNA

Pakt Rama-Basha/ Në listën për deputetë shfaqen emra të

Lulzim Basha, Edi Rama

Partia Socialiste një ditë më parë prezantoi kandidatët për deputet të PS në listën e hapur dhe të mbyllur për të gjitha qarqet.

Ajo që bie në sy si nga lista e PS ashtu edhe e PD-së, vihet re se ka personazhe politike që janë nën hetim nga SPAK-u por edhe personazhe që lidhen me ngjarje tragjike si ajo e 21 Janarit, ku 4 persona mbeten viktima në Bulevard.

Le të marrim rastin e Agron Malajt. Ky i fundit u dorëhoq nga detyra si kryebashkiak për të kandiduar si deputet pranë PS.

Sekretari i Përgjithshëm i PS-së Blendi Klosi bëri me dije se Agron Malaj do të jetë kandidat i PS-së në listën e hapur në qarkun e Dibrës.

Malaj nuk është një emër i panjohur.

Agron Malaj ka qenë komandant seksioni i Njësisë Speciale të Gardës së Republikës në protestën e 21 Janarit. Ai ishte një ndër 10 oficerët e shkarkuar nga ish-ministri i Brendshëm, Saimir Tahiri, ku sapo ky i fundit mori detyrën.

10 oficerët ishin pjesëtarë të “grupit të zjarrit”, të cilët qëlluan mbi protestuesit në tubimin ku mbetën katër qytetarë të vrarë.

Përveç kësaj Agron Malaj lidhet dhe me 5D-në.

Vëllai i Agron Malajt, Fatos Malaj ka fituar tenderin e kamerave në Bashkinë e Tiranës, shumat e të cilave janë qindra milionë lekë, si ka denoncime për raste ku ai ka dhënë fonde për drejtorët në burg të kryebashkiakut Veliaj.

Agron Malaj, me njërën dorë te “21 Janari” dhe tjetrën te “5D” kërkon të bëhet deputet
11 Mars, 16:55

Po të njëjtën skemë duket se ka përdorur dhe Lulzim Basha në përzgjedhjen e kandidatëve të tij.

Pasi ka përzgjedhur as më shumë e as më pak se Alfred Ahmetcenaj, gjithashtu një ish-komandanti i njësisë speciale të Gardës së Republikës, pjesë e grupit të zjarrit më 21 janar të 2011, i cili është kandidat zyrtar për deputet në Tiranë për Koalicionin Euroatlantik.

Ahmetcenaj ka qenë ish-numri dy i Gardës, kur në bulevard u vranë 4 protestues.

Ai arriti t’i shpëtonte drejtësisë dhe gjeti mbështetjen e Lulzim Bashës, duke e bërë kryetar dege në Mat asokohe.

Pas hapjes së hetimeve për "21 Janarin", një tjetër përgjim është zbuluar ku protagonist është ish-komandanti kryesor i Gardës, Ndrea Prendi dhe Alfred Ahmetcenaj. I pari i paralajmëron të hapin zjarr, kurse i dyti e konfirmon.

Duke patur këtë skemë para syve, e gjitha kjo duket si një “pakt” mes Ramës dhe Bashës, të cilët po futin në lista për kandidatë për deputetë personazhe që lidhen me një nga ngjarjet tragjike në vend për të cilën ende nuk është bërë drejtësi.

E ndërsa familjarët kërkojnë të vihet në vend drejtësia, Luli Basha dhe Rama u paraqesin për kandidatë për deputet emra që lidhen ngushtë me këtë me 21 Janarin./ CNA