Opozita “thyen” bojkotin/ Ulet në tryezë me mazhorancën për “Territorialen”

11 Shkurt 2026, 15:45, Politikë CNA

Opozita ka vendosur të ndërpresë bojkotin dhe të rikthehet në tryezën e diskutimeve me mazhorancën për reformën territoriale. Gjatë mbledhjes së përbashkët, palët ranë dakord për listën e ekspertëve të komisionit dhe për sekretarin.

Deputeti i opozitës, Luçiano Boçi, theksoi se komisioni duhet të prodhojë një rezultat konsensual dhe jo variante të ndara politike. Ai paralajmëroi se nëse raporti final nuk përfshin realisht propozimet e opozitës, procesi do të ishte formal dhe hipokrit.

“Komisioni që është ngritur me konsensus, duhet të ketë një produkt, do të punojmë me ekspertët, por në fund fare ne duhet të dalim me një produkt të dakordësuar. Nëse rruga jonë kalon pjesërisht përmes konsensusit, votojmë raporte të caktuara që kërkojnë konsensus dhe në fund fare del me variant të personalizuar politik, atëherë çfarë kuptimi ka komisioni. Për këtë duhet të biem parimisht dakord. Po ne duhet të kemi një produkt të përbashkët, nëse ecim me idenë se çfarëdo që themi ne nuk konsiderohet si pjesë e propozimeve që faktohen në raportin final, jemi në rrugëtim hipokrit dhe formal. A kemi siguri për këtë ne? Kohe, nuk kemi. Duhet të kemi produkt konsensual. Nëse s’ka produkt është mungesë e gatishmërisë suaj dhe tonës për të pranuar variantin. Po jo një variant me ngjyrën e partisë suaj dhe një me ngjyrën blu të PD-së”, tha Boci.

Nga ana tjetër, bashkëkryetari socialist, Arbian Mazniku, shprehu gatishmërinë e PS-së për të arritur një produkt të përbashkët, madje idealisht me unanimitet në Kuvend. Ai përmendi si prova mirëbesimi barazinë në përbërjen e komisionit, bashkëkryesinë dhe përfshirjen e partnerëve si BE dhe Kongresi i Autoriteteve Vendore.

“Pozicioni është i qartë i PS-së, që të ketë një komision, i cili të dalë me një pozicion. Nëse është e mundur që kjo reformë të kalojë me unanimitet në kuvend, do ishte zgjidhja ideale, ka tashmë prova të dhëna nga mazhoranca të mirëbesimit për një proces të tillë, duke nisur që nga bashkëkryesia, të kërkesa për ndarjen në mënyrë të barabartë të anëtarëve të komisionit, te kërkesa që ne të thërrasim Kongresin e Autoriteve vendore, por edhe BE, si partnerë të punës së këtij komisioni. Të ndërgjegjshëm për faktin se kjo reformë do ishte e shëndetshme nëse do t'ia dalim ta kalojmë bashkërisht. Mirëbesimi i dhënë nga PS nuk mund të jetë një mekanizëm për të bllokuar punën për të mos e çuar para këtë reformë”, tha Mazniku.

Në thelb, të dyja palët deklarojnë synimin për një reformë të përbashkët, ndërsa mbetet për t’u parë nëse do të arrihet një marrëveshje konsensuale./ CNA