"Nuk kam koment për ankimimin e Veliajt në Kushtetuese"/ Blushi: Opozita do të ketë emrin e kandidatit shumë shpejt

29 Shtator 2025, 12:34, Politikë CNA

"Nuk kam koment për ankimimin e Veliajt në Kushtetuese"/

Kreu i Grupit Parlamentar të Partisë së Lirisë, Tedi Blushi, në një deklaratë për mediat në përfundim të Konferencës së Kryetarëve, akuzoi mazhorancën se ka futur në program 19 projektligje pa caktuar afatet e shqyrtimit dhe komisionet përgjegjëse.

Një nga projektligjet është edhe ai për barazinë gjinore, që ka ngjallur mjaft polemika në politikë dhe në opinionin publik.

"Vetëm sot u njohëm që kanë mbërritur në kryesinë e Kuvendit të paktën 19 projektligje nga qeveria dhe në mënyrë të paqartë nuk është specifikuar as ku do të shqyrtohen as kush është komisioni përgjegjës.

Dua të denoncoj futjen në mënyrë tinëzare të projektligjit në Kuvend për barazinë gjinore, një atentat ndaj familjes dhe vlerave të saj që tregon dhe njëherë që kjo mazhorancë është vendosur për të vijuar goditjen në themel të vlerave të familjes," tha Blushi.

I pyetur për kandidatin e opozitës për Tiranën, Blushi tha se opozita e bashkuar do të ketë shumë shpejt emrin.

"Dua t’ju them që shumë shpejt opozita e bashkuar do të ketë emrin e kandidatit fitues për Bashkinë e Tiranë. Nuk kam asnjë koment për ankimimin e Erion Veliajt në Kushtetuese, aq më tepër për një institucion të kapur nga kryeministri Edi Rama”, tha Blushi./CNA