“Mos hidh shashka”/ Përplasje e fortë mes Artan Fugës dhe Skënder Gjinushit

6 Mars 2025, 13:40, Politikë CNA

“Mos hidh shashka”/ Përplasje e fortë mes Artan Fugës

Debate të ashpra ka pasur në mbledhjen e Akademisë së Shkencave mes akademikut Artan Fuga dhe kryetarit të Akademisë, Skënder Gjinushi.

Diskutimet kanë nisur në lidhje me raportin vjetor ku Fuga është drejtuar me kritika ndaj Gjinushit duke thënë se janë bërë projekte të mbifaturuara dhe të gjitha kanë shkuar në dorën e një personi, i cili nuk ka mundësi fizike të realizojë të gjitha ato që kërkohen.

Po ashtu ka kërkuar transparencë dhe autokritikë.

Sipas Fugës, Akademia nuk duhet të mbyllet brenda vetes dhe raporti nuk duhet të paraqitet në mënyrë propagandistike.

Pjesë nga debati mes Fugës dhe Gjinushit

Fuga: Sot shkenca nuk matet se ç’kërkon si buxhet, por çfarë jep dhe si kontribut shoqëror dhe prurje të matshme. Këtu kemi vetëm çfarë harxhojmë dhe çfarë duam. Mendoj se nuk kemi akses në detajet që jepen për projektet dhe më duket e tepërt që qoftë dhe njeriu më i nderuar nga brenda një viti të ketë 7 projekte a 10 projekte me mijëra euro. Po si i realizon?

Gjinushi: Po kush? Po nuk flitet kështu po flet për kolegët. Cili?

Fuga: Më lër të mbaroj.

Gjinushi: Cili?

Fuga: Unë këtu nuk do përmend emra.

Gjinushi: Vërejtjet bëhen konkrete dhe jo teorira. Megjithatë bëj teorinë dhe do marrësh përgjigje.

Fuga: Për disa projekte po të doni ju bëj një raport, ku disa projekte janë të mbifaturuara për mendimin tim. Këto janë vërejtjet e mia.

Gjinushi: Thuaje njërin, thuaje pra. Thuaje pra se derisa po e thua. Mos hidh shashka këtu.

Fuga: Ju lutem ruani etikën.

Gjinushi: Jo, jo, shashkat janë shkelja më e rëndë e etikës.

Fuga: Ruani etikën. Më lini të flas. Nuk e di në shqip fjalën shashka, po ma shpjeguat...

Gjinushi: Shashka janë broçkullat.

Fuga: Aha… Po broçkullat çfarë janë?

Gjinushi: Diskursi yt i zakonshëm.

Fuga: Po unë kush jam?

Gjinushi: Ai që të njohin të gjithë.

Fuga: Ju faleminderit z.kryetar. Kjo është etika.

Gjinushi: Ti nuk del për të diskutuar, por për të filozofuar. Në mënyrë të çuditshme bën sikur ngre probleme dhe s’je në gjendje të thuash kush është problemi.

Fuga: Faleminderit për kritikën tuaj.

Gjinushi: Etika më e keqe është kur flet kot.

Fuga: Për ju ata që hedhin kritika janë armiq.

Gjinushi: Këto që the nuk janë kritika, vetëm tregojnë se sa i saktë është raporti.

Fuga: Po mirë dakord, a do e them mendimin tim?

Gjinushi: Ke akoma mendim?

Fuga: Unë mendoj se kam, por mendimi i mendimit nuk është mendimi juaj.

Gjinushi: Mendimi i mendimit është budallëk.

Fuga: Faleminderit, unë nuk hy në atë etikë.

Gjinushi: Tani thuaj dhe një shashkë të fundit.

Fuga: Çfarë është shashka?

Gjinushi: Po ti je filozof, nuk di shashkën ti?