"Ministra të pushkatuar"/ Rama flet hapur: Korrupsioni duhet luftuar në të gjitha institucionet

20 Prill 2024, 09:19, Politikë CNA

"Ministra të pushkatuar"/ Rama flet hapur: Korrupsioni duhet

Edi Rama

Kryeministri Edi Rama ftoi në podcast-in e tij pedagogun e gazetarisë, Mark Marku, ku analizuar qeverisjen e tij në 3 mandate.

Kreu i qeverisë u shpreh se gjatë qeverisjes së tij ka pasur edhe ministra "të pushkatuar" dhe për këtë ka pasur vullnet politik.

Rama dha edhe mesazhin se lufta me korrupsionin nuk është thjesht lufta e drejtësisë, por një luftë që duhet vijuar në të gjitha institucionet.

Pjesë nga biseda:

Mark Marku: Do të shfaqesh pas një viti në zgjedhje, 3 mandate, me të mirat e të këqijat e tij. Në një qeverisje të gjatë disa probleme themelore rëndojnë, korrupsioni, emigracioni i gjeneratave të reja. Çfarë do t'u thuash shqiptarëve për mandatin e katërt. Kështu jemi mirë e vazhdojmë kështu. Apo do t'u thuash do bëjmë çfarë s’kemi bërë?

Edi Rama: Kështu jemi e vijojmë kështu, përpiqem të mos e them asnjëherë. Them po, ne mund të mos jemi më të mirët, por më mirë se ne nuk ka. Nëse ndihem i kënaqur nuk ka më motiv, prandaj në këtë aspekt besoj e shpresoj nuk jam në rrezik.

Është e vërtetë që kemi probleme, pasi do të ishte e kotë t’i mohonim, por ne i kemi dhënë këtij vendi një mundësi që nuk e ka pasur më parë. Një drejtësi që vepron e pavarur nga pushteti politik. Kemi pasur ministra "të pushkatuar" edhe më përpara, por ka qenë me vullnet politik dhe drejtësia ka qenë pushka për t’i vrarë. Kemi një moment shumë të rëndësishëm ndryshimi, sa është inkurajues dhe fragjil dhe garantimi i paprekshmërisë së procesit është i domosdoshëm. Nga ana tjetër lufta me korrupsionin nuk është thjesht lufta e drejtësisë, por një luftë për të pasur në të gjithë frontin e institucioneve një solidaritet dhe kapacitet që ia kushton hapësirat për ta luftuar…. Në këtë aspekt kemi bërë shumë gjëra pozitive. Duhet të ngremë shumë më tepër stekën e luftës kundër korrupsionit në të gjithë frontin, jo thjesht te drejtësia. Ky është momenti, njëri nga dy momentet, që ma bën më tundues se çdo gjë tjetër pozicionin në raport me mandatin e katërt. Se në kushte të tjera nëse do të kisha bindjen e plotësimit të mozaikut që kemi nisur me imazhin e Shqipërisë, turizmin e ngritjen e nivelit të turizmit, mbase nuk do të kisha më tundim.

Mark Marku: Problemi është që ju si strukturë qeverisje të mos prodhoni shumë të korruptuar që drejtësia të funksionojë. Të mos jetë drejtësia një fabrikë që bluan të korruptuarit. Vetë sistemi qeverisës të funksionojë që të pakësojë sa më shumë. Duhet diçka konkrete. Ok, drejtësia të merret, por duhet reagim i brendshëm ndaj korrupsionit./CNA