Kontrata e lobimit me kompaninë amerikanë/ Reagon PD: Po paguhet nga patriotët shqiptarë

26 Prill 2025, 22:43, Politikë CNA

Kontrata e lobimit me kompaninë amerikanë/ Reagon PD: Po paguhet nga

Partia Demokratike ka reaguar këtë mbrëmje lidhur me lajmin se një kompani amerikane do të paguhet rreth 6 milionë dollarë për të lobuar për PD-në në SHBA. Në një deklaratë, PD bën me dije se kjo shumë po paguhet 100% nga patriotë shqiptarë që jetojnë dhe punojnë prej dekadash në SHBA.

Sipas PD-së, synimi i bashkëatdhetarëve në SHBA është bashkëpunimi i PD me aleatin kryesor të Shqipërisë për të rivendosur demokracinë funksionale dhe shtetin e të drejtës në Shqipëri.

Në deklaratë, Partia Demokratike thekson se nuk ka asnjë barrë financiare apo detyrim kontraktual që lind nga kjo marrëveshje.

“Në lidhje mbi një informacion të shperndarë në media për lobimin e PD pranë Qeverisë dhe Kongresit të SHBA dëshirojmë të sqarojmë sa vijon:

Komuniteti shqiptaro amerikan përmes fondacionit “Make Albania Great Again” ka kontraktuar kompaninë “Continental” për të ndihmuar në konsolidimin e marrëdhënieve miqësore të Partisë Demokratike si forca më e madhe opozitare me Kongresin dhe Qeverinë e SHBA. Synimi i bashkëatdhetarëve tanë në SHBA është bashkëpunimi i PD me aleatin kryesor të Shqipërisë për të rivendosur demokracinë funksionale dhe shtetin e të drejtës në Shqipëri.

Kompania “Continental” drejtohet nga Ambasadori Carlos Trujillo i cili njihet gjithashtu dhe si avokat i Presidentit Trump dhe si antikomunist i palëkundur në qëndrimet e tij!

Kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë dhe punojnë prej dekadash në SHBA si dhe demokratë të tjerë të larguar nga Shqipëria këto 10 vite për shkak të regjimit të Edi Ramës!

Partia Demokratike duke falenderuar demokratët antikomuniste të komunitetit shqiptaro - amerikan për bujarinë dhe e patriotizmin e tyre sqaron opinionin publik se ndonëse ka dhënë dakordësinë për marrjen e këtij shërbimi në përputhje të plotë me ligjet e të dy vendeve, nuk ka asnjë barrë financiare apo detyrim kontraktual që lind nga kjo marrëveshje”,-thuhet në deklaratë./CNA