Këlliçi: Javën e kaluar Veliaj pagoi 800 mijë euro për inceneratorin e Tiranës

11 Qershor 2024, 10:01, Politikë CNA

Këlliçi: Javën e kaluar Veliaj pagoi 800 mijë euro

Belind Këlliçi, foto e marrë nga Partia Demokratike

Anëtari i kryesisë së PD-së, Belind Këlliçi, i ftuar në ‘Kafe Shqeto’ në "Syri TV" ka folur për protestën e një dite më parë para Bashkisë së Tiranës ku u kërkua dorëheqja e Erion Veliajt.

Këlliçi u shpreh se vetëm javën e kaluar Erion Veliaj ka vazhduar të paguajë inceneratorin e Tiranës që nuk ekziston, duke i dhënë 800 mijë euro.

Këlliçi nënvizoi më tej se përshkallëzimi i protestës ka ardhur si pasojë e talljes që u bëhet qytetarëve të Tiranës, ku çdo ditë vidhen.

"Sot që flasim është dita e 162-të ku kryetari i opozitës ndodhet në arrest shtëpie, pa asnjë provë dhe fakt. Ndërsa këta janë të kapur në vjedhje, me duar në xhepat e qytetarëve, 132 mln euro janë paguar për inceneratorin që nuk ekziston, 800 mijë euro janë paguar javën e kaluar. Para dy javësh, ndërsa ne ishim në protestë në datën 28 maj, ditë e martë, Erion Veliaj paguante ‘5D’-në për një punë të pabërë, një pistë biçikletash. E dimë që janë hajdutë, një pjesë e drejtorëve janë në burg, e dimë që është kompania e Veliajt, e dimë se hoteli 50 mln euro në Durrës është i lali Erit, i cili është Erion Veliaj. Në kulmin e kësaj vjedhjeje, duhet të kesh kurajë të madhe të dalësh dhe të bësh pagesa, sikur s’ka ndodhur asgjë.

Për sa kohë Altin Dumani lë një hajdut si Erion Veliaj të shkojë çdo ditë në zyrë, të prishë prova, të paguajë kompaninë që është e drejtorëve të tij dhe vjedhin taksat e qytetarëve, 800 mijë euro janë paguar javën e kaluar për inceneratorin, Altin Dumani nuk qenka koleg, por vartës i Erion Veliajt dhe Veliaj nuk paska pasur faj që del e thotë se isha te kolegët, dhe u mbolli dhe pemë një ditë më pas. Pra, 8 orë ka qenë në SPAK për të diskutuar për pemët. Edhe përshkallëzimi ynë dhe reagimi ynë kanë ardhur për shkak të kësaj talljeje që bëhet, pikësëpari me qytetarët e Tiranës, institucionet e drejtësisë, median. Jeni ju dhe një media tjetër që flisni për skandalet e ‘5D’ dhe një portal që merret me këtë çështje", tha Këlliçi./CNA