Këlliçi: Bollino, killeri me pagesë që ka përfituar prona dhe ka marrë para nga inceneratorët

16 Janar 2024, 21:25, Politikë CNA

Këlliçi: Bollino, killeri me pagesë që ka përfituar

Anëtari i Kryesisë së PD-së, Belind Këlliçi

Anëtari i Kryesisë së PD-së, Belind Këlliçi e ka cilësuar Carlo Bollinon një vrasës me pagesë të opozitës që ka përfituar prona nga qeveria dhe ka marrë para nga inceneratorët.

Ai denoncoi në emisionin e Adi Krastës pronën shtetërore të përfituar nga Bollino tek “ish-reparti i Orëve”, tokë e cila ishte dhuruar nga ish-pronarët për ndërtimin e një gjimnazi.

Këlliçi tha se media e Bollinos është kriminalizuar me falsifikimet që ka kryer për pronën, ku sot ka ndërtuar televizionin e tij.

Gjithashtu, ai përmendi edhe pagesat që ky botues ka marrë nga kompania e inceneratorit të Tiranës për t’i hedhur hi syve shqiptarëve me një incenerator që nuk ekziston.

“Rama ia doli të kriminalizojë edhe median. Një ndër to është një rast konkret e një padie të fundit që ne kemi ndjekur në fakt, që është një nga shërbëtorët e kauzës së inceneratorëve, që është edhe media e italianit të famshëm Carlo Bollino, që është kallëzuar javën e kaluar nga një deputet tjetër për faktin që ka marrë një truall 4 mijë metra katrorë në mes të Tiranës, i falur për tu bërë gimnaz nga familja Begeja dhe nga 4 familje të tjera pronare në truallin e ish-kompleksit ‘Partizani’. Kjo ka qenë dhe një nga kauzat të cilat unë e kam prekur.

Pikë së pari, gjatë fushatës kërkesa kryesore në njësinë Nr. 7 ishte se 80 mijë banorë kërkonin të kishin një gjimnaz dhe i vetmi truall që ishte dhënë dhe ishte planifikuar ishte marrë nga ky italian, një pseudo-botues, duke u marrë me 1 euro 4 mijë metra katrorë për të bërë një media, e cila është vënë në shërbim të plotë të inceneratorëve dhe qeverisë.

Të grabisësh një truall publik, një truall që është dhënë për t’u bërë gjimnaz në një zonë me 80 mijë banorë, ta marrësh me 1 euro, ta privatizosh, të falsifikosh aneks-kontratat tregon që ti nuk je më media, por je një killer me pagesë për të vrarë këdo opozitar në këtë vend.

Edhe ky rast është i përfshirë brenda te skema e inceneratorëve. Vjet unë kam publikuar fatura të lëshuara nga inceneratori i Tiranës për këtë media, që i bënte reklamë një inceneratori që nuk ekziston, që na thonin çdo ditë, na nxirrnin reklama sikur na ishte rikthyer drejri në inceneratorin e Tiranës, sikur na ishin rikthyer kafshët, shpendët, ndërkohë që aty nuk ka incenerator. Ai është një mashtrim shumë i madh dhe të gjitha këto bëhen se këto media ushqehen me ato para.

Ky është rasti kur një media kapet plotësisht nga qeveria, ushqehet me paratë e qeverisë dhe falsifikon dokumenta zyrtare, manipulon akte zyrtare të shtetit. E kemi bërë publike se si janë falsifikuar aneks-kontratat, mbi të cilat ka dalë leja e ndërtimit për këtë media, ndërkohë që e ka patur me qira dhe nuk ka patur asnjë të drejtë pronësie”, theksoi Këlliçi./ CNA