Gjyqi për Fredi Belerin/ Artan Hoxha zbulon strategjinë e avokatëve mbrojtës

16 Tetor 2023, 22:56, Politikë CNA

Gjyqi për Fredi Belerin/ Artan Hoxha zbulon strategjinë e

Artan Hoxha foli mbrëmjen e sotme për gjyqin e Fredi Belerit, kryebashkiakut të zgjedhur të Himarës.

Hopxha tha se avokatët mbrojtës të Fredi Belerit dhe vetë kryebashkiaku i zgjedhur i Himarës e shohin me strategji zgjatjen e procesit gjyqësore.

Ai deklaroi në emisionin e Ylli Rakipit se avokatët e Belerit ndërhynë në proces dhe shkaktuan debat duke bërë që seanca të shtyhet.

Gazetari theksoi se ata po e shfrytëzojnë zhurmën që bëhet në mediat greke dhe duan të përfitojnë lejen e betimit.

"Nga data 12 maj kur Beleri është arrestuar dhe deri sot, ai ka bërë të gjithë përpjekjet që të ketë qoftë edhe një orë leje, për të patur mundësinë dhe për të ushtruar të drejtën si fitues i zgjedhjeve të Himarës, për të bërë betimin, kudo të jetë e mundur dhe pastaj pranon të rrijë në burg. Javën e kaluar, të enjten u çel procesi gjyqësor. Deri tani të gjithë tentativat që kanë bërë avokatët e Belerit, për të marrë lejen, nuk e kanë marrë dot lejen. Procesi do të zgjasë, sepse nuk është me gjykim të shkurtuar. Avokatët e Belerit, besoj edhe ai vetë, e shohin si strategji që procesi të zgjatet.

Në proces, avokatët e Belerit kërkuan fjalën, nuk lanë prokurorinë të lexonte kërkesën për gjykim, apo fabulën me të cilën e kanë sjellë në Gjykatën Speciale kundër Korrupsionit dhe Krimit të Organizuar, por menjëherë ndërhynë dhe kërkuan, së pari pavlefshmërinë e akteve që ka bërë prokuroria, që nga arrestimi dhe mënyra si janë marrë prova dhe së dyti të përjashtohej nga gjykimi një gjyqtare, sepse sipas tyre, gjyqtarja ka marrë një vendim kundër tyre në fazat e mëparshme të vlerësimit të masave të sigurisë.

Në këto kushte, seanca u ndërpre dhe do të vijojë nesër, do të shohim sërish media greke, ambasadoren greke dhe gazetarë me sa pashë ishin të mirë, jo të zakonshëm, pra i kanë dhënë shumë rëndësi. Nesër do të jetë seanca e dytë, por me sa kam parë deri tani avokatët e Belerit nuk kanë hequr dorë nga tentativat për të përfituar qoftë edhe një leje të shkurtër, që të ketë mundësi të bëjë betimin.

Deri tani, mundësia për ta penguar Belerin është kjo që ka ndodhur. Beleri mund të heqë dorë vullnetarisht nga mandati ose nëse dënohet me vendim të formës së prerë. Por, ai nuk e bën dot betimin nëse është ndaluar. Forma që është ndjekur, është që Beleri të rrijë në masën maksimale, pra arrest me burg, nuk i është miratuar leja edhe pse në tre muajt e parë, ka qëndruar në spitalet e burgut. Nga ana tjetër, nëse ai nuk është i lirë, ai nuk e realizon dot betimin, nuk bëhet në qelitë e burgut", tha Hoxha. / CNA