E fundit!

18:44 Aktualitet

Mblidhet të enjten Konferenca e Kryetarëve/ Ja çfarë pritet të vendoset në seancë

Konferenca e Kryetarëve do të zhvillojë të enjten mbledhje...

Debate në Konferencën e Kryetarëve/ Opozita kërkon mocion me debat për raportin e OLAF

8 Tetor 2025, 10:21, Politikë CNA

Debate në Konferencën e Kryetarëve/ Opozita kërkon mocion me

Në mbledhjen e Konferencës së Kryetarëve, kryetari i Grupit Parlamentar të Partisë Demokratike, Gazment Bardhi, ka kërkuar që interpelanca urgjente me kryeministrin Edi Rama për çështjen “Aruba” të përfshihet në rendin e ditës së seancës plenare.

Partia Socialiste rrëzoi kërkesat për interpelancën me kryeministrin Rama dhe mocionin për fondet e IPARD-it.

Bardhi tha se kërkesat për dy mocionet me debat duhet të kalojnë për votim në Kuvend.

"Keni sjellë rendin e ditës, por mungojnë dy çështje që i keni detyrim.

E para, interpelanca urgjente me Kryeministrin. Kjo duhej të ishte pika e parë e rendit të ditës, dhe duke mos e përfshirë, ju keni shkelur në mënyrë flagrante Kushtetutën dhe Rregulloren e Kuvendit.

E dyta, është e vërtetë që nuk kemi gjetur konsensus për dy mocione në Konferencën e Kryetarëve. Megjithatë, Rregullorja ju detyron që kërkesat për mocionet të vijnë në Kuvend dhe të hidhen në votim.

Ju, z.kryetar, në mënyrë të habitshme, vazhdoni të shkelni Kushtetutën dhe Rregulloren. Keni një muaj që keni marrë besimin e mazhorancës dhe, pas kësaj, do të duhej të silleshit si kryetar Kuvendi në respekt të Kushtetutës. Por ju nuk e bëni këtë, përkundrazi, e shkelni në mënyrë sistematike Kushtetutën", tha Bardhi.

Opozita ka kërkuar mocion me debat për raportet e OLAF-it në lidhje me shpërdorimin e fondeve IPARD për bujqësinë. Mazhoranca rrëzoi kërkesën.

Bardhi tha se mazhoranca nuk do debat sepse fondet i ka përfituar babai i Suel Çelës.

"Nuk kemi bërë asnjë rrugë tjetër, përveç asaj rruge ku ju ngritët komisionin e famshëm 'Xhafa'.

Nuk ka asnjë kundërthënie në kërkesën tonë për mocion me debat dhe ngritjen e një komisioni të posaçëm. Por kështu ndodh kur bëhet një lexim gjysmak dhe ndërkohë në mendje keni vetëm si ta rrëzoni kërkesën.

Por unë e kuptoj që ju nuk doni debat. Jeni këtu për të miratuar ligje që shkruhen në kompjuterin e Klodian Zotos, në tavolinën e Edmond Begos, apo për të miratuar ligje që i japin prona Suel Çelës.

Pretenduat se nuk keni raportet e OLAF-it. Ato janë zyrtare dhe të publikuara në faqen publike të internetit. Por ju, z. Balla, jeni i zënë me çështje të tjera.

Ju nuk doni debat, sepse ka përfituar babai i Suel Çelës, babai i një personi që është shpallur kreu i një organizate kriminale. Ai ka marrë 150 mijë euro, prandaj nuk doni ju debat.
Ne duam debat, sepse ato para duam t’i shkojnë fermerit të Bradasheshit, një fermeri në Divjakë, Lushnjë apo Fier. Por ju nuk keni këtë merak. Ju keni merak se mos dalin dokumentet. Mos u shqetësoni, ne i kemi dokumentet.
Ti, Taulant, qesh! Qesh, sepse pronat e atyre i ke pasur merak dhe kjo është e dokumentuar. Por po ta them këtu: çdo javë do të keni kërkesa për debat, sepse ne nuk jemi këtu për të përfaqësuar interesat e Suel Çelës.
Ashtu siç mendoj se shumë kolegë socialistë nuk janë këtu për këtë qëllim.?Ata që janë për të përfaqësuar interesat e krimit, gjejnë yçkëla për të refuzuar debatin", tha Bardhi./CNA