CNA zbulon emrat e të deleguarve të PD-së në qarqe

18 Gusht 2024, 16:46, Politikë CNA

CNA zbulon emrat e të deleguarve të PD-së në qarqe

Selia e PD-së

PD është në mbyllje të listës së plotë të të deleguarve të cilët do të drejtojnë qarqet e kësaj force politike deri në vitin 2025. Besohet që këta emra gjithasshtu do të jenë edhe ata që do të kryesojnë listën e deputetëve në qarqe por ekziston mundësia që të ketë edhe ndryshime.

Burime zyrtare nga PD, bën të ditur për CNA se do të ketë disa lëvizje dhe risi në këto emra politikanësh, drejtuesish kryesore të PD-së në qarqet që ata do të vendosen, lëvizjet por diku edhe persona që do të qëndrojnë.

Në Vlorë do të jetë Bujar Leskaj ai që do të drejtojë, por edhe që do të kryesojë listën e deputetëve të këtij qarku.

Në Fier diskutohet emri i Gazmend Bardhit, nënkryetarit të PD-së, por ende është në pikpyetje nëse do të jetë ai që do drejtoj politikisht këtë qark, apo nëse do të kryesojë dhe listën, raporton CNA.

Në Durrës pritet të drejtojë nënkryetari tjetër i PD-së, Oert Bylykbashi.

Në Lezhë pritet të konfirmohet si drejtues politik Agron Gjekmarkaj.

Ndërkohë Shkodra është ajo që përbën risi në këto lëvizje, për shkak të debateve dhe konflikteve të brendshme politike, është përzgjedhur z. Luçiano Boçi nënkryetar i kësaj force politike, i cili nuk do të jetë në Elbasan, por do të drejtoj qarkun e Shkodrës. Ende nuk dihet nëse do të jetë ai që do të kryesojë dhe listën e deputetëve në zgjedhjet e parlamentare të 2025, por e sigurt është që ai do të jetë drejtuesi politik i këtij qarku.

Gjithashtu CNA ka mësuar se në Berat do të jetë Eno Bozdo, i cili ka qenë në këtë post edhe në zgjedhjet e mëparshme kur PD drejtohej nga Lulzim Basha. Në Korçë pritet që Ivi Kaso të marrë drejtimin politik të këtij qarku.

Suprizë është emri i Ervin Salijanit i cili pritet të marrë drejtimin politik të qarkut të Elbasanit.

Sipas burimeve zyrtare nga PD, bëhet e ditur gjithashtu se ende nuk është vendosur se kush do të jenë emrat e drejtuesve politik për qarkun e Kukësit dhe Dibrës. Ndërkohë ende nuk është konfirmuar emri edhe për qarkun e Gjirokastrës.

Shumë nga emrat e njohur të tjerë të PD-së pritet të drejtojnë në qarkun e Tiranës, siç është Flamur Noka, Tomorr Alizoti, Belind Këlliçi dhe shumë të tjerë.

Ndërsa pritet që ditët e para të shtatorit të bëhet publike lista me drejtuesit politik të PD-së në të gjitha qarqet e vendit. Ndrësa drejtuesit politik të fillojnë nga puna për përgatitjen e strukturave për fushatën e zgjedhjeve 2025. /CNA