Basha, kontradiktor nga dreka në darkë/ Dy deklaratat e ndryshme, pasi humbi vulën e PD-së

12 Qershor 2024, 10:08, Politikë CNA

Ditën e martë, Gjykata e Apelit vendosi t’i japë vulën e Partisë Demokratike Sali Berishës, duke e njohur zyrtarisht këtë të fundit si kryetarin legjitim të forcës më të madhe opozitare.

Ky vendim i gjykatës la nga ana tjetër Lulzim Bashën pa vulë. Ky fakt e ka shqetësuar jo pak Bashën, duke e bërë që të japë deklarata kontradiktore brenda një dite.

Fillimisht ai tha se betejën nuk e ka për vulë, logo apo karrige, ndërsa theksoi se nuk e komenton vendimin e gjykatës.

“Nuk komentoj vendimet e gjykatave, ky është dhe një standard i imi, i yni si Parti Demokratike, për të cilin kemi deklaruar që do të përmbahemi edhe në rastin e vendimit të gjykatës së Apelit. Ajo që dua t’u them shumë mbështetësve, demokratëve, por dhe qytetarëve që janë mërzitur me këtë vendim, e vetëkuptueshme që janë të mërzitur se prisnin një vendim tjetër, është t’ju them të mos mërziten, të mos dëshpërohen. Në fund të fundit këtë betejë as nuk e kemi nisur dhe as nuk e vazhdojmë për logo, për vulë apo për karrige”, tha Basha.

Në mbrëmjen e së martës, Basha u shfaq me një tjetër deklaratë, këtë herë më pak të moderuar për institucionin ligjzbatues. Basha tha se po konsideronte rekursin e vendimit të Apelit pasi kishte parë parregullsi në proces, ndërsa në një mendje me të bëri edhe strukturat, që sipas tij e mbështesnin.

Basha shkoi edhe më larg me akuzat duke thënë se ka një bashkëpunim mes Sali Berishës dhe Edi Ramës. Ndërsa pretendoi se i vetmi kundërshtar serioz i kryeministrit Edi Rama, ishte pikërisht ai, Lulzim Basha.

“Duket qartë se është përvijuar koalicion antivlerash në horizont dhe ka alibi për të mbajtur Ramën në pushtet. Kjo qeveri ka zvogëluar hapësirat për debat publik. PD dhe demokratët do të largojnë këtë qeveri, nëse vendimet i shërbejnë kësaj, do të ecim përpara. Nuk mund të mbajmë në këmbë pazare të vjetra. Ne luftojmë për interesat e njerëzve dhe jo personale. Nëse do të dish se si ndihem, unë ndihem demokrat dhe ne kemi përgjegjësi ndaj të gjithë atyre që këtë betejë e bëjnë për idealet demokratike. Rama kundërshtar serioz të tij ka pasur vetëm Bashën… Po është hedhur ideja e rekursit, po konsiderohet nga juristët. Ka një konstatim juridik që vendimi është i padrejtë dhe i pabazuar në ligj”, u shpreh ai.

Basha tha se ka triumfuar një koalicion antivlerash, që mban peng tranzicionin e tejzgjatur shqiptar. Teksa u përfshi në zhvillimet politike të ditës, Basha harroi një fakt thelbësor, se edhe ai tregoi mungesë vlerash, pasi nga mëngjesi në darkë në deklaratat e tij mungonte koherenca./ CNA