web counter
LEXO PA REKLAMA!

SHKARKO APP

App Store
Google Play

E fundit!

x

Balla nga Librazhdi: Nëse doni Europën, votoni Ramën. Nëse doni gjumë, votoni Lulin

19 Prill 2025, 19:17, Politikë CNA

Balla nga Librazhdi: Nëse doni Europën, votoni Ramën. Nëse

Drejtuesi Politik i Partisë Socialiste për Diasporën, Taulant Balla mori pjesë në një takim elektoral në qytetin e Librazhdit, ku u prit nga qytetarë dhe mbështetës të PS-së.

“Nëse doni punë, votoni Edi Ramën; nëse doni gjumë, Luli nga e ka mësuar? Nga Saliu e ka mësuar! S’ka më. Bëjmë baba, të të ngjaj. Dhe prandaj, ne sot i themi shqiptarëve, i themi popullit të dashur të Librazhdit që zgjedhja në këto zgjedhje është shumë e thjeshtë: kush do Europën, voton Edi Ramën; kush do gropën, e dini ju”-tha Balla.

Gjatë fjalës së tij, Balla theksoi rëndësinë e votës më 11 maj dhe kërkoi mbështetjen për Partinë Socialiste.

“Sa shumë prej jush, sa mijëra, më keni kërkuar ndihmë, ndërsa përplaseni gjithë këto vite nëpër dyer ambasadash, duke pritur radhën për të marrë një letër për të shkuar në Greqi, për të marrë një takim në ambasadën gjermane për të shkuar në punë në Gjermani. Kjo histori merr fund më 11 maj. Po i dhe votën Partisë Socialiste, merr pasaportën evropiane. Po e çove votën dëm, vota jote shkon në gropë. Dhe prandaj, në këto zgjedhje jo shumë vota, por të gjitha votat. Kush është ai këtu në Librazhd që do të provojë prapë bufin? E ke provuar në ‘92-shin, s’doli gjë. E mbylli në ‘97 me Shqipërinë në zjarr, me flakë dhe me mijëra jetë të humbura. Kush i ka harruar jetët e humbura të vitit 1997? Kush i ka harruar paratë e humbura të emigrantëve në 1997? Apo tani thotë: 'Më falni se e bëra gabim.' Po kur erdhe për herën e dytë? Erdhe për herën e dytë me flakë në Gërdec, plumba në Bulevard dhe një gropë të madhe borxhesh ku e zhyte Shqipërinë, dhe ku pensionistëve u dhemb sot”,-tha Balla.

Balla u ndal te reforma në drejtësi dhe arrestimet e profileve të larta, edhe brenda PS-së.

“Tani, pas 34 vjetësh, çfarë kërkon më ky nga Shqipëria? Çfarë është diçka që nuk ia ka dhënë më Shqipëria këtij? I dha gjithçka: e bëri kryeministër, e bëri president, i dha shtëpi, i dha komplekse. Mori kompleksin 'Partizani' ditën për diell dhe thotë: 'Jo, s’e kam marrë unë, e ka marrë dhëndri.' Tani le të përballet me drejtësinë. Kush e imagjinonte në 2013 që do të vijë një ditë që në këtë vend do të bëhet drejtësi? Kush e imagjinonte në 2013 që presidentë, kryeministra, zv/kryeministra, kryetarë parlamenti dhe ministra do të shkojnë para drejtësisë? Mos e harroni asnjëherë. Këtë e ka bërë Partia Socialiste e Shqipërisë. Edhe për ata që thonë se ka ministra të Partisë Socialiste që shkojnë para drejtësisë, po shyqyr që më në fund erdhi dita të shkojmë para drejtësisë të gjithë të barabartë. Kjo është gjë e mirë. Se jemi edhe në kohë të Pashkës, këtë nuk e bëri Zoti, nuk e bëri Allahu, këtë e bëri Partia Socialiste”,-tha Balla.

Balla kujtoi kohën kur Basha dhe Berisha u mbyllën në çadër vetëm për të mos i votuar ligjet e Reformës në Drejtësi.

“Me votat tona në Parlament në 2016, Partia Socialiste e Shqipërisë ishte gati të prishte koalicionin me partinë e Ilir Metës, vetëm për të votuar Reformën në Drejtësi. Ju e mbani mend — edhe Luli, edhe Saliu, u mbyllën në çadër vetëm që të mos votoheshin ligjet e Reformës në Drejtësi. Kjo nuk duhet harruar. Votë për Saliun këtu nuk ka, por mos jepni asnjë votë edhe për ata që imitojnë Saliun. Ky bufi i tha biznesmenit do ta bëjmë dividentin 10%, dhe i tha ai: 'Po në 8 e kemi.' Po këta janë më keq akoma. Kanë dalë rrugëve dhe thonë: 'Do shpërndajmë para.' E mbani mend skemën piramidale: fut 1, merr 3, dhe në fund, siç thotë kryeministri, merr noc rrokun”,-tha Balla.

Në fund, Balla pati disa fjalë edhe për kandidatët për deputetë që do të përfaqësojnë Librazhdin uke u bërë thirrje dhe demokratëve që t'i votojnë.

“Por këtë e kam edhe për demokratët. Ne duhet të çojmë dy librazhdas në Parlament dhe mua të tretin. Po i hyjmë pak analizës — edhe Arbri po na del nga Librazhdi, se është këtu matanë Stëblevës. Po meraku im është edhe Olsi Komici.  Duhet të gjithë të bëhemi bashkë, të votojmë nr. 5, Partinë Socialiste, dhe Olsi Komicin, që t’i japim Librazhdit fuqi. T’i japim votës tonë forcë dhe të mbështesim fort Edi Ramën dhe Partinë Socialiste”,-tha Balla./CNA





Lajmet e fundit nga