web counter
LEXO PA REKLAMA!

SHKARKO APP

App Store
Google Play

Skandali me qumështin/ Muçollari: Qeveria Rama prej 12 vitesh nuk ofron asnjë siguri për ushqimet

19 Prill 2025, 15:50, Politikë CNA

Skandali me qumështin/ Muçollari: Qeveria Rama prej 12 vitesh nuk

Anëtari i Kryesisë së PD-së, Grigels Muçollari, denoncoi sot skandalin e qumështit me përmbajtje aflatoksine.

Muçollari u shpreh gjatë një konference për shtyp nga selia blu se nga analizat e kryera janë konfirmuar rastet me praninë e substancave helmuese te qumështi.

“Ndërkohë që Anila Denaj, përgjegjëse për sigurinë ushqimore në vend, vazhdon fushatën dhe drejton çetën e saj të patronazhistëve, zyrtarisht është konfirmuar prania e aflatoksinës në qumësht, në disa raste. Zbulimi është bërë nga emisioni ‘Piranjat’, por është pranuar edhe nga AKU. E vendosur para fakteve, kjo agjenci nuk ka mundur ta fshehë fenomenin shqetësues. Janë të paktën 6 raste të konstatuara, të verifikuara pas analizave. Bëhet fjalë për mostra të marra në qumësht që është konsumuar nga janari e këndej. Aflatoksina është një substancë helmuese, toksike, që dëmton shëndetin e njeriut.

Bashkimi Europian ka protokolle të rrepta për mbajtjen nën kontroll. Ministrja jonë e Bujqësisë ka protokolle të rrepta për ta mbajtur të fshehtë, siç ka ndodhur edhe më parë me salmonelën apo me pesticidet në mandarinat tona. I kërkojmë sërish zonjës Denaj në këto pak ditë që i kanë ngelur të bëjë detyrën, dhe të bëjë transparencë të plotë mbi praninë e aflatoksinës në qumësht, burimin e saj pasi për 12 vite kanë dështuar t’ju ofrojnë siguri për ushqimet më të shtrenjta në rajon që paguan secili prej nesh. I kujtojmë SPAK-ut se neglizhenca apo 'shpërdorimi i detyrës' mbi sigurinë ushqimore është një shkelje e rëndë e ligjit dhe cenim i shëndetit.

Partia Demokratike do ta shpallë institucionin e Sigurisë Ushqimore si institucion të Sigurisë Kombëtare. Dhe ne jemi angazhuar me ekspertët më të mirë për një ndryshim të shpejtë dhe rrënjësor për të garantuar çdo familje që ushqimet në tregjet tona të jenë të sigurta. Një platformë që do ta bëjmë publike së shpejti. Një platformë që do sjellë një transformim total, që do garantojë siguri ushqimore për qytetarët, për familjet tona”, tha Muçollari./ CNA





Lajmet e fundit nga