E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Po sikur protesta e 22 dhjetorit e PD të dështojë?

21 Dhjetor 2025, 20:23, Opinione Ardi Stefa

Po sikur më 22 dhjetor sheshi të mbetet bosh? Po sikur thirrja e Partisë Demokratike të përplaset me indiferencën, me lodhjen, me mosbesimin? Po sikur të mos ketë as turmë, as zemërim, as revoltë? Po sikur refuzimi të jetë aq i madh saqë protesta më madhështore të jetë dështim?

Nuk do të ishte thjesht një protestë e dështuar, por vazhdimi i një aktakuze politike.

Protestat nuk dështojnë rastësisht; ato dështojnë kur nuk besohen. Kur nuk frymëzojnë. Kur nuk përfaqësojnë më askënd përveç atyre që i organizojnë. Dhe pikërisht këtu qëndron rreziku më i madh për PD-në: jo te pushteti i Ramës, por te boshllëku që ka krijuar mes vetes dhe shoqërisë.

Nëse protesta e 22 dhjetorit nuk ka pjesëmarrje, kjo do të thotë se demokratët nuk e ndjejnë më PD-në si shtëpinë e tyre politike. Do të thotë se njerëzit nuk dalin më për parime, por janë lodhur nga betejat personale të një grupi të vogël që e ka shndërruar opozitën në pronë private. Do të thotë se qytetarët nuk e shohin më protestën si mjet ndryshimi, por si ritual të konsumuar, pa ide, pa horizont, pa shpresë.

Një protestë e dështuar do të tregonte se PD ka humbur aftësinë për të prodhuar kauzë. Sepse sot nuk mjafton të jesh kundër Ramës. As të shash e akuzosh Ballukun. As narkoshtetin dhe vjedhësit e votave. Duhet të kesh një vizion, një projekt, një moral politik që të bëjë njerëzit të ngihen nga kafeneja apo të dalin nga shtëpia. Pa këto çdo thirrje është zhurmë.

Më e rënda është se një dështim i tillë do të konfirmonte se PD nuk po lufton më për demokracinë, por për rikthimin e disa emrave; disa ego-ve; disa dinosaurëve politikë që qytetarët i kanë neveritur tashmë. Dhe kur protesta shihet si betejë personale, retorika është tejet e vjetëruar dhe e konsumuar, ajo braktiset nga populli, sado t’i ketë vajtur thika në palcë e të urrejë këtë qeveri.

Nëse sheshi është bosh, mesazhi duhet të kuptohet qartë, sepse është i qartë: shqiptarët nuk janë apatikë, janë të zhgënjyer. Ata nuk refuzojnë politikën, por refuzojnë këtë politikë. Refuzojnë një opozitë që flet për popullin, por nuk e dëgjon atë. Që thërret për demokraci, por nuk e praktikon brenda vetes. Që kërkon besim, por nuk bën asnjë hap për ta merituar. Që pavarësisht betimeve opozitare bën pazare me qeverinë.

Një protestë pa pjesëmarrje do të ishte prova se PD ka humbur lidhjen organike me shoqërinë. Se nuk mobilizon më as bazën e vet, jo më qytetarin e paangazhuar dhe që kërkon identitet përfaqlsimi. Dhe kjo është shumë më dramatike sesa çdo humbje zgjedhore.

Gjithsesi, dështimi i protestës së 22 dhjetorit do të ishte ishte pasqyra e një krize të thellë identiteti. Një sinjal se PD ose duhet të reformohet rrënjësisht, ose të pranojë se roli i saj si opozitë reale ka mbaruar.

Në politikë ka një rregull të pamëshirshëm: kur populli nuk vjen më pas teje, problemi nuk është populli. Problemi je ti! Dhe duhet të mbash përgjegjësi!

p.s: Edhe pse po i shkruaj këto rreshta gati 24 orë përpara zhvillimit të protestës, jam i bindur se në rast dështimi, përsëri fajin do ta ketë populli; asnjëherë udhëheqësit legjendarë. Ata kanë 12 vite që vetëm humbasin, përbetohen se do fitojnë dhe përsëri pas çdo humbjeje nuk mbajnë asnjë përgjegjësi!