Përmbytjet, koha e autopsisë jo e pafajësisë!

9 Janar 2026, 17:50, Opinione Mentor Kikia

Koha kur vendi përmbytet nuk është “Dita e gjykimit të madh”, kur dikush ngre akuza, e dikush hedh në det përgjegjësinë.

Padyshim, nëse qeveria nuk do të mbajë asnjë përgjegjësi, zgjidhja është e thjeshtë: “Shiu i madh, nuk kemi çfarë ti bëjmë. Kudo ka përmbytje dhe dëme”. Shtoji është bllokimin e kanaleve nga mbeturinat dhe ja u bë. Shihemi në përmbytjen e radhës.

Po ashtu, dëmshpërblimi i të prekurve është pjesë e zgjidhjes, për tu mbyllur gojën njerëzve.
Po paratë e dëmshpërblimit nga dalin? Nga taksat tona, padyshim.

Por, a nuk do të ishte më mirë që këto para të investoheshin në infrastrukturë mbrojtëse sesa të blejmë çdo tre muaj dyshekë dhe lavatriçe të dëmtuara nga balta?

Katastrofat natyrore, përtej dimensionit politik që nuk e shmangim dot, duhet të shndërrohen në shkollë.

Duhet të verifikohet çdo gjë. Ku i kemi pikat e dobëta? Përse u përmbyt një fshat apo një lagje në qytet? Ishte faji i kanalit, është i bllokuar dhe duhet ç’bllokuar? Eshtë i vogël e duhet zgjeruar? Duhet ngritur një pritë e re? Duhet lartësuar një argjinaturë? Duhet ngritur një argjinaturë e re? Duhet të hapen kanalizime të reja në qytet? Duhet të ndalohen ndërtimet në një zonë të caktuar? Duhet shpërngulet popullsia nga një fshat i caktuar? Duhet ngritur një zonë pyjore mbrojtëse diku tjetër?

Padyshim, duhet të grumbullohen edhe mbetjet e të merren masa që ato të mos hidhen më nëpër kanale, edhe për të mos i bllokuar ata.

Kur dikush vdes, i bëjnë autopsinë për të mësuar shkakun, kur ka dyshime. Dhe kjo i shërben mjeksisë edhe për tu përsosur. Besoj e dini shprehjen “mjeksia është zhvilluar mbi kufoma”? Edhe njeriu duhet të përmirësojë kushtet e jetesës, nisur edhe nga problemet me të cilat përballet.

Dhe ky është rasti që, në vend të sulmeve të opozitës dhe shfajësimeve të qeverisë, të bëhet autopsia e të ndryshojmë sjellje. Sepse, pas një muaji mund të kemi shiun e radhës dhe do të jetë e njëjta histori, madje edhe më keq. Sepse pas një vit mund të kemi një qeveri tjetër, por sërish do të jetë sërish e njëjta histori.

Sepse, sipas qeverisë së sotme, në 2012 fajin e kishte qeveria për përmbytjet. Ndërsa në 2026, fajin e ka Perëndia. Ndërsa për opozitën e sotme, në 2012 fajin e kishte Perëndia, ndërsa tani e ka qeveria.

Asnjë vend nuk është imun nga përmbytjet. Ne duhet të bëjmë gjithçka që të minimizojmë dëmet. Kjo është sfida.