E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Autokratët t’i vënë gishtin kokës, ka nisur një epokë e re e hegjemonisë së SHBA

4 Janar 2026, 08:39, Opinione Ardi Stefa

Autokratët t’i vënë gishtin kokës, ka nisur një

Reagimet entuziaste të një pjese të opinionit opozitar shqiptar pas zhvillimeve ndërkombëtare, të krahasuara me rastin Maduro, po shoqërohen me interpretime të nxituara dhe pritshmëri jorealiste për politikën e brendshme shqiptare.

Referuar këtyre, Ardi Stefa thekson se së pari shqiptarët duhet të kujtojnë se kreu i opozitës në Shqipëri mbetet ende i shpallur Non Grata nga Shtetet e Bashkuara të Amerikës, një fakt që vazhdon të peshojë rëndë në raportet e tij me Perëndimin. Shqipëria, nga ana tjetër, është vend anëtar i NATO-s dhe nuk ka dalë asnjëherë kundër interesave afatshkurtra, afatmesme apo afatgjata amerikane.

Pavarësisht skandaleve të shumta që i atribuohen qeverisë shqiptare, Tirana zyrtare vijon të bashkëpunojë ngushtë me SHBA-në dhe Bashkimin Europian, duke ruajtur një linjë të qartë bindjeje strategjike. Pikërisht për këto arsye, Uashingtoni ka treguar historikisht se shpesh preferon stabilitetin politik në vendet aleate, përballë aventurave të paparashikueshme.

Në këtë kontekst, edhe nëse goditet figura e kryeministrit Rama, të cilin kundërshtarët e quajnë ironikisht “Ramaduro”, mbështetja amerikane për një opozitë që sulmon drejtësinë, SPAK-un dhe institucionet e reja mbetet shumë e vështirë për t’u imagjinuar. Aq më tepër kur alternativat politike perceptohen si të konsumuara dhe pa besueshmëri ndërkombëtare.

Ideja se largimi i Ramës do të sillte automatikisht një zëvendësim cilësor në pushtet shihet nga Ardi Stefa si një tjetër “përrallë politike”, e përdorur më shumë për të mbajtur të karikuar militantët sesa për të reflektuar realitetin.

Megjithatë, Stefa del në dy përfundime nga situata aktuale. Së pari, autokratët në mbarë botën kanë arsye të reflektojnë, pasi SHBA ka treguar se mbetet një fuqi dominuese dhe e vendosur kur preken interesat e saj strategjike. Së dyti, në diskursin publik shqiptar po përforcohet ideja se opozita aktuale nuk është në gjendje ta rrëzojë qeverinë me forcat e veta dhe se shpresat për ndërhyrje të huaj mbeten më shumë fantazi politike.

Retorika e disa “sovranistëve” që ëndërrojnë skenarë spektakolarë me ndërhyrje amerikane në politikën e brendshme shqiptare, sipas Stefës, dëshmon një keqkuptim të thellë të mënyrës se si funksionojnë interesat ndërkombëtare, duke i shërbyer kryesisht konsumit të brendshëm dhe mobilizimit të një baze militante tashmë të lodhur.

Analiza e Ardi Stefës

Gjithologët shqiptarë që sot po gëzojnë për kapjen e Maduros e dinë që kreu i opozitës në Shqipëri është ende Non Grata?

E dinë që Shqipëria është anëtare e NATO-s?

E dinë që Shqipëria nuk ka dalë kundër interesave afatshkurtra, afatmesme apo afatgjata amerikane ndonjëherë?

E dinë që qeveria shqiptare, sado skandale t'i rëndojnë mbi shpinë, bashkëpunon ngushtë me Shtetet e Bashkuara të Amerikës dhe BE dhe është e bindur ndaj tyre?

E dinë që për këto arsye e shumë të tjera Amerika shpesh herë preferon stabilitetin?

E dinë që edhe po u godit "Ramaduro" kjo opozitë, me këtë mendësi e sjellje që ka, sidomos ndaj Drejtësisë dhe SPAK, vështirë se do të mbështetet nga SHBA?

E dinë që "Ramaduron" dhe njerëzit e tij nuk do t'i zëvendësojnë uturakmbajtësit?

Apo u gjet përralla e radhës për të mbajtur të karikuar milirantët nëpër llaftore?

Por me dy gjëra jam dakord:

1- Autokratët duhet t'i vënë gishtin kokës, pasi një epokë e re e hegjemonisë së SHBA ka nisur! SHBA tregoi se është e fuqishme dhe nuk ndalet përpara asgjëje, sidomos kur cënohen interesat e saj.

2- Rëndom themi nëpër biseda që Ramën mund ta rrëzojnë nga pushteti vetëm të huajt, pasi partia e Berishës nuk e rrëzon dot. Në rastin tonë amerikanët. Por një gjë është e qartë, sovranistët e Berishës që ëndërrojnë zbarkim të forcave speciale amerikane në Surrel dhe të kapin për zhelesh Ramën e "fësht" në Washington, me retorikën e tyre dëshmojnë që s'marrin erë nga politika dhe interesat e tyre janë veç për konsum të brendshëm dhe për të ushqyer me lugë bosh militantët e tyre fanatikë që kanë gjithë jetën që "ngrohen në diell"./ CNA