E fundit!

18:28 Aktualitet

Të enjten seanca e fundit e sesionit parlamentar/ Në rend dite, një sërë projektligjesh

Seanca e fundit plenare e këtij sesioni parlamentar do të ...

Amnezi apo imoralitet politik?

18 Shtator 2022, 19:32, Opinione Emili Bibolli

Emili Bibolli

Kudo që ta çosh telekomandën e televizorit kohët e fundit, në çdo kanal televiziv përmendet skandali i lobimit të PD në SHBA me para ruse. Çështje kjo së cilës PD po përpiqet ti largohet gjithmonë e më shumë, me pretendimin se s’di asgjë për të. Çuditërisht të gjithë nuk kanë asnjë dijeni për këtë që ka ndodhur. Frikacakë dhe gënjeshtarë të pandreqshëm.

Para pak ditësh për këtë skandal me kompani offshore dhe para të dyshimta, z.Berisha sulmoi ish-birin e tij politik në media. Jo vetëm kaq, por hoqi edhe veten mënjanë dhe iu shmang çdo përgjegjësie duke i lënë barrën e fajit ish-kryetarit të PD. Më ka mashtruar Lulzim Basha tha. Kjo fjali nuk ka se si mos të të lerë me gojë hapur.

Nëse bëjmë një analizë të mashtrimeve ndër vite nga këta dy politikanë, Lulzim Basha nuk është aspak rasti ku nxënësi ja kalon mësuesit. Lulzimi nuk shquhet as për pjekuri politike, as për dinakëri të rafinuar dhe as për aftësi manipuluese, e aq më tepër që t’ia hedhë Belzebubit të politikës shqiptare.

Ndërkohë po të kthehemi pas në 2019 deklaratat e z.Berisha bien në kundërshtim të plotë me këto që thotë sot. Çfarë emri ti vemë kësaj?

Mashtrimi dhe pafytyrësia janë shndërruar në norma në politikën shqiptare. Këta politikanë prej vitesh kanë mashtruar, sulmuar e fyer njëri-tjetrin dhe në fund kanë shtrënguar duart. Ilir Meta njëherë kundër Sali Berishës, njëherë në aleancë për të qeverisur bashkë. Edi Rama njëherë kundërshtar i Ilir Metës, njëherë në qeveri me të.

Lulzim Basha njëherë kundër Ramës e njëherë në qeveri teknike me të. Njëri shfaqet si shpëtimtar i zbritur në Tokë për të shpëtuar popullin nga regjimi imagjinar, tjetri shfaqet si shpëtimtar që populli e ka kërkuar për ti kthyer lirinë dhe i treti shfaqet si alternativa më e mirë në historinë e Shqipërisë për të qeverisur këtë popull. E ndërsa i katërti shfaqet si triumfator që nuk ka njohur asnjë humbje në jetën e tij.

Sapo interesi preket fillon lumi i fyerjeve dhe akuzave, kur interesat përputhen këta politikanë ulen dhe shtrëngojnë duart. Njëherë kështu, njëherë ashtu, kjo është një tallje e madhe që i është bërë dhe i bëhet sistematikisht popullit shqiptar.

Në fund të gjithë këta, kur e do puna ulen në tavolinë për të kopsitur pazaret e radhës. Populli si gjithmonë vuan pasojat e pazareve të politikanëve tanë, përfundon i braktisur dhe i tradhëtuar nga ata që votohen për ti siguruar një të ardhme më të mirë.