E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

LAMTUMIRË LEGJENDË

17 Janar 2025, 17:13, Kulturë CNA

LAMTUMIRË LEGJENDË

Ish-futbollisti i Kombëtares dhe i disa klubeve në Shqipëri, "Nderi i Kombit" Sabah Bizi mbylli sytë një ditë më parë në Shkodër në moshën 77-vjeçare.

Në nderim të figurës së tij, stadiumi "Loro Boriçi" në Shkodër hapi dyert e mortit duke pritur këtë të premte qindra e qindra qytetarë dhe tifozë të Vllaznisë e jo vetëm, që këtë herë i madhi Bizi i mblodhi për herë të fundit.

“Sot është një ditë e trishtuar për të gjithë Shkodrën, sportin e futbollin në veçanti. Sabah Bizi është një figurë e jashtëzakonshme, frymëzues për brezat e rinj.Është identiteti i klubit, identiteti i Vllaznisë. Figurë që ka dhënë kontribut, emocione dhe ne si brez jemi rrit me modelin e tyre. Do të jetë figurë që do të frymëzojë gjithmonë.

Ngushëllime familjes Bizi.Unë e mbaj mend atë moment që erdhi tek dhomat e zhveshjes. Ishte emocion. Unë e kam takuar edhe në ditëlindje. Herë pas here flisnim në telefon. Ardhja e tij në stadium dhe tek dhoma e zhveshjes ishte krenari.Unë do i kisha propozuar këshillit bashkiak dhe Bashkisë, që figurat të përjetësohen jo vetëm në zemër por edhe në tribuna. Katër tribunat kryesore të stadiumit të Shkodrës të marrin emrin e katër korifejve të futbollit Sabah Bizi, Ramazan Rragamiz Mehdin Zhega dhe Paulin Ndoja”, tha Alban Xhaferri.

“Sot është një ditë e trishtë, ditë e zezë për mua dhe për të gjithë miqtë e Sabah Bizit.Për familjen e komunitetin e futbollit. Sabah Bizi është ikonë, legjendë me kontributet e tij te Vllaznia por gjatë gjithë jetës së tij. Sabahi humbi shikimin por nuk mungoi në stadium. Ai ka jetuar me futbollin. Në këtë ditë të trishtë dua t'i shpreh ngushëllimet Brikenos e të gjithë familjës Bizi por edhe të gjithë futbollistëve e ish-futbollistëve dhe komunitetit futbollistik shqiptar. Kujtimi i tij do jetojë gjatë sepse është një nga figurat më të mëdha. Takimi i fundit me të ishte në telefon, para ndeshjes me Celinë kur më tha president dua të vij të shoh ndeshjen. Dhe pse nuk shikonte ai sërish vinte në stadium. Më parë jemi takuar në Shkodër. Është nder për të gjithë që një impiant apo ambient sportive të përjetojë emrin e Sabah Bizit", është shprehur Presidenti i Fedaratës, Armand Duka.

“60 vite shoqëri. Qëkur nisëm futbollin pa u nda asnjëherë, përveç 4 muajve të fundit që ishte nëpër spitale. I përkryer ishte. Kemi qënë bashkë dhe me moshë. Kur ka qënë në fushë ai ka qënë gjithçka. Ishim të sigurtë me të në lojë", tha Pulin Ndoja.

"Futbolli Shkodran e ai shqiptar, historia e tij nuk do ishte kjo që është pa emrin e Sabah Bizit.Ai mbetet një prej emblemave në futbollin Shqiptar. Nëse dikush do të kuptojë pak nga karakteri i Sabah Bizit mjafton të shohim historinë kur Loro Borici thirri një djalë 19-vjeçar për të përballuar një kolos siç ishte Becanbaer. Jo vetëm që është histori unike por nuk mundet me u përsërit më. Ngushëllime të ghithëve", tha Rudi Vata.

“Shkodra sot ka humbur shumë. Unë Sabahin e kam shembull në jetë dhe pas futbollit. Njeri i mirë, futbollist i mirë, trajner i mirë, mik i mirë. Unë kam humb një shok të zemrës. Propozimi im është që stadiumit të Shkodrës t'i vendoset emri Sabah Bizi. Është më i madhi i të gjitha kohrave bashkë me Panajot Panon"

“Sabahin e kam patur shok që në vitin '68, kur ishim ushtar. E që nga ajo ditë nuk jam ndarë me të. Flisja 2 herë në javë dhe kur nuk ishte mirë me shëndet. Dihet kush është Sabahi e nuk ka nevojë të thurësh legjenda për të. Në krye ka qënë Sabahi”, u shpreh Faruk Sejdini.

"Sabah Bizi për mua është një brilant që sot jemi mbledhur ta çojmë në shtëpinë e fundit por që kontributi i tij do vijojë. Jemi inspiruar nga loja dhe na ka bërë krenar, fati im më i madh ka qënë trashëgimi i fanellës së tij. Mendoj që Sabahi ka qënë lojtari më i mirë e të gjithë kohrave në futbollin shqiptar”, tha Fatbardh Jera.

“Ndarja nga jeta e Sabahit na trishton. Sa është gjallë thu po shkoj ta takoj, ose do e shoh nëpër Shkodër. Por ndërkohë ndihem i mbushur e optimist se ai dha për Shkodrën e Shkodra po e nderon. Je në kujtesë, kthehesh ne gjigand përjetësohesh. Nëse do të thuash Vllazni do thuash Sabah dhe anasjelltas.Është e pamundur të mos thuash Vllaznia e Sabahut. Ai ka lënë jashtëzakonisht shumë gjurmë në qytet. Sabahi është lindur në rrugicat e Shkodrës, që në shkollë mbante top lecke e i tha gjermanit prit se jam dhe unë këtu dhe pse 17 vjeç. Jam marrë shumë me problemet e sportit në karrierën time. Por vëmendjen e kam pas gjithmonë tek ekipi i Vllzanisë. Ajo ishte fut te gjoksi jem" u shpreh Osman Mula.

“Jemi sot këtu për t'i dhënë lamtumirën legjendës së futbollit.Një njeriu që i përkiste jo veç Shkodrës por gjithë Shqipërisë. E kemi brohoritur, mbështetur e përkrahur.Ndonjëherë kur e kemi pasur kundërshtar duke e vlerësuar shumë, unë kam qënë në këto pozicione. Duket si ngjarje e pabbesueshme, ne si shoqëri kemi nevojë për shembuj të tillë. Shprehim ngushëllimet së pari i takojnë familjes, të afërmve por edhe gjithë sportistëve. Shkodrës do i mungojë një nga ikonat e saj", tha Luçiano Boçi.

Sabah Bizi ka qenë një nga personazhet më të vlerësuara në futbollin tonë. Ai është nderuar me titullin “Nderi i Kombit”. Po ashtu, në një anketë për vlerësimin e futbollistëve të shekullit të kaluar në Shqipëri, Sabah Bizi është renditur në vend të dytë.

Lamtumirë legjenda Sabah Bizi!/ CNA