1 shekull nga vrasja e luftëtarit Vasil Tromara/ Historiani “risjell” kontributin e patriotit

22 Qershor 2024, 21:48, Kulturë CNA

1 shekull nga vrasja e luftëtarit Vasil Tromara/ Historiani

Foto nga aktiviteti

Me rastin e 100 vjetorit të vrasjes së luftëtarit dhe patriotit Vasil Tromara nga fshati Qytezë i Devollit, u organizua një aktivitet për të përkujtuar figurën e këtij veprimtari të shquar. Aktiviteti i iniciuar nga historiani Niko Kotherja, mbështetur nga Bashkia Devoll, u zhvillua pranë ambjenteve të Qendrës Kulturore në qytetin e Bilishtit, ku u shfaq edhe ekspozita lidhur me veprimtarinë dhe aktivitetin e Tromarës.

Kontributi i Vasil Tromarës në lëvizjen patriotike shqiptare ka qenë i dalluar, me kontributin e madh si luftëtar i çetave patriotike në periudhën e Pavarësisë dhe konsolidimit të shtetit shqiptar.

Ai ishte pjesë e rëndësishme e përpjekjeve për pavarësi dhe arsim kombëtar. Historiani Niko Kotherja tregon aktivitetin dhe veprimtarinë e patriotit nga Qyteza, i cili la gjurmë në historinë e popullit shqiptar.

"Është e rëndësishme që rikthehet vëmendja te figurat e historisë tonë kombëtare, me origjinë nga zona e Devollit por që kanë patur kontribut të madh jo vetëm në këtë zonë e në Shqipëri, por edhe jashtë saj. Një prej tyre është Vasil Tromara i cili vjen nga një familje që ka kontribute të mëdha sa i përket luftës patriotike të shqiptarëve. Njëkohësisht, Vasil Tromara është njëri prej atyre që ngriti flamurin dhe bashkoi qarkun e Korçës me qeverinë e dalë nga Kongresi i Lushnjës, në 1920. Ka marrë pjesë me armë në dorë sa i përket Pavaresisë se Shqipërisë, ka kontribuar dhe për konsolidimin e shtetit shqiptar. Ai është një nga themeluesit e Kongresit të Lushnjës dhe në 1924 vjen si komandant i xhandamërisë të nënprefekturës të Bilishtit në atë kohë, ku ekzekutohet para 100 vjetësh në fund të Qershorit."

Në ekspozitën e shfaqur gjatë aktivitetit, janë ekspozuar dokumenta të ndryshme, fotografi historike dhe botime të vjetra origjinale të mbledhura gjatë viteve për Vasil Tromarën.

"Sot ne kemi përgatitur një ekspozitë e cila është e ndarë në dy pjesë, sa i përket materialeve origjinale autentike të kohës që vijnë përmes botimeve e shkrimeve, fotografive të hershme. Kemi edhe stenda të tjera që tregojnë aktivitetin e tij brenda dhe jashtë, me organizimet që ka patur, dhe me pika kulmore të aktivitetit të Vasil Tromarës."

Për kryetarin e Shoqatës Devolli, Guri Seferi, përkujtimi i këtyre figurave historike me kontribut të madh për zonën e Devollit dhe më gjerë, janë mjaft të rëndësishme.

"ky është një vlerësim maksimal që i bëhet jo vetëm popullit të Devollit por edhe qarkut të Korçës, për arsye se kontributi i familjes Tromara nga Qyteza e Devollit është më gjerë se Devolli e Korça. Është një familje patriotike, me kontributin më të madh të dhënë nga personi që ne sot po e kujtojmë, ai i cili ka qenë një atdhetar dhe një drejtues i çetës të krahinës së Bilishtit, për të mbrojtur trojet dhe emrin Shqipëri. Me rastin e 80 vjetorit të Çlirimit të Atdheut ne sot jo vetëm kujtojmë aktivitetin, kontributin e Vasil Tromarës por edhe atë të djalit të tij të vetëm i cili ra në luftë, duke u bërë një nga dëshmorët e parë të Luftës Nacional Çlirimtare të qarkut të Korçës."

Në përfundim të aktivitetit, pjesëmarrësit patën mundësinë të shihnin ekspozitën, ndërsa historiani Niko Kotherja u ka dhuruar libër për t'u njohur me figurën e Vasil Tromarës./ CNA