Përmbytën portet e Europës me kokainë/ Kush janë shqiptarët, pjesë e organizatës kriminale

8 Gusht 2025, 18:10, Kronika CNA

Përmbytën portet e Europës me kokainë/ Kush janë

SPAK goditi një organizatë kriminale ndërkombëtare pas zbërthimit të “SKY ECC”.

Sipas SPAK, struktura kriminale e përmasave ndërkombëtare, udhëhiqej nga Ervis Çela i cili së bashku me vëllanë e tij ishin vendosur në Paraguai.

Nga hetimet e SPAK rezulton se një rast i zbuluar i trafikut të drogës kishte intinerarin nga Paraguai në Belgjikë përmes portit të Anversës.

Grupi drejtohej nga Franc Gergeli Çopja dhe Ervis Çela, të cilët në bashkëpunim me një shtetas brazilian në shtator të vitit 2020 organizuan trafikun e 11.6 ton kokainë të fshehur në kuti boje dhe sapuni “Fox”.

Po këta shtetas organizuan trafikun e 16.4 ton kokainë nga Paraguai në Hamburg përmes bombolave metalike të kutive të bojës me vlerë prej 1.5 miliardë deri 3.5 miliradë euro.

Pjesë nga njoftimi i SPAK

"Gjatë hetimeve ndërkombëtare, janë identifikuar dhe goditur dy ngarkesa të mëdha kokaine, të transportuara nga Amerika e Jugut drejt Evropës dhe më konkretisht:

Shtator 2020 – Paraguaj → Belgjikë (Anvers)

Grupi i drejtuar nga E.Ç. dhe F. G., në bashkëpunim me një shtetas brazilian, organizoi trafikimin e 11.6 ton kokainë, fshehur në kuti sapuni dhe kuti boje metalike me logon “Fox”. Ngarkesa u nis nga porti i Villeta (Paraguaj) dhe mbërriti në Anvers më 04.11.2020.

Në vijim, gjatë operacioneve të policisë në Roterdam, u sekuestruan 600 kg kokainë dhe 2 milionë euro, si dhe u arrestuan shtetasit shqiptarë M.D. dhe N.B.

Dhjetor 2020 – Shkurt 2021 – Paraguaj → Gjermani (Hamburg)

E.Ç. dhe F.G. organizuan dhe financuan trafikimin e 16.4 ton kokainë, fshehur në bombola metalike me bojë/kollë ndërtimi dhe të stampuara me logo (“sy me rrufe të kuqe”, “Puma”, “shenja infinit”), me vlerë tregu prej 1.5 miliard deri 3.5 miliard euro. Ngarkesa, e shpërndarë në disa kontejnerë, mbërriti në Hamburg më 12.02.2021 dhe u sekuestrua nga autoritetet doganore gjermane. (Cocaine ‘worth billions’ seized in record Germany and Belgium haul).

Tipologjia e organizatës kriminale

Hetimet e kryera në bashkëpunim me autoritetet ligjzbatuese partnere dhe analiza e komunikimeve të përgjuara në aplikacionin SkyECC kanë zbuluar një strukturë kriminale të përmasave ndërkombëtare, e udhëhequr nga shtetasit E.Ç. dhe F.G., e cila kontrollonte në mënyrë të plotë zinxhirin e trafikut të kokainës – nga prodhimi, magazinimi dhe përpunimi në laboratorët e Paraguait, transporti ndërkombëtar dhe shpërndarja në tregjet europiane, deri te pastrimi dhe qarkullimi i të ardhurave të fituara./CNA