Në kërkim ndërkombëtar për disa vepra penale/ Ekstradohet nga Republika Domenikane, 41-vjeçari

7 Shtator 2025, 08:50, Kronika CNA

Në kërkim ndërkombëtar për disa vepra penale/

Në orët e para të mëngjesit të sotëm është finalizuar ekstradimi nga Republika Domenikane drejt Shqipërisë i 41-vjeçarit S. P. alias V. P.

41-vjeçari ishte shpallur në kërkim ndërkombëtar pasi ndaj tij GJKKO ka caktuar masën e sigurisë “Arreest me burg”.

Ndaj tij rëndojnë akuzat për trafikimnarkotikësh, kryerje të veprave penale dhe pastrim parash.

S. P. u arrestua në Punta Cana të Republikës Domenikane.

Njoftimi i policisë

Finalizohet ekstradimi i shtetasit shqiptar S. P., alias V. P., nga Punta Cana/Republika Domenikane, në Shqipëri.

Në vijim të bashkëpunimit intensiv të Interpol Tiranës me Interpol Santo Domingo, Republika Domenikane, në kuadër të operacionit policor ndërkombëtar të koduar “The Wanted”, në orët e para të mëngjesit të sotëm, u finalizuan procedurat për ekstradimin nga Punta Cana/Republika Domenikane drejt vendit tonë, të shtetasit shqiptar S. P., alias V. P., 41 vjeç, lindur në Lushnjë.

Ky shtetas ishte i shpallur në kërkim pasi Gjykata e Posaçme e Shkallës së Parë për Korrupsionin dhe Krimin e Organizuar, ka caktuar masën e sigurimit personal “Arrest me burg” për veprat penale “Trafikim i narkotikëve”, “Kryerja e veprave penale nga organizata kriminale dhe grupi i strukturuar kriminal” dhe “Pastrim i produkteve të veprës penale ose veprimtarisë kriminale”.

Si rezultat i informacionit të siguruar nga Departamenti i Policisë Kriminale në Policinë e Shtetit dhe i shkëmbimit të tij nëpërmjet Interpol Tiranës me Interpol Santo Domingo, u bë i mundur arrestimi në Punta Cana/Republika Domenikane, duke u finalizuar me ekstradimin drejt vendit tonë të këtij shtetasi. Shtetasi S. P., në përfundim të procedurave, iu dorëzua Drejtorisë së Përgjithshme të Burgjeve.

Policia e Shtetit falënderon autoritetet e Republikës Domenikane dhe autoritetet gjermane për bashkëpunimin për finalizimin e procedurave të ekstradimit të 41-vjeçarit në Shqipëri.

41-vjeçari lidhet me ngarkesën prej 11 tonësh kokainë, 600 kilogramë nga të cilat u sekuestruan në Roterdam të Holandës, midis 7 dhe 8 nëntorit 2020.

Ai akuzohet gjithashtu për financimin e blerjes së 10 kilogramëve të tjerë në të njëjtin qytet.

41-vjeçari ishte pjesë e një grupi kriminal transnacional që vepronte në disa vende europiane dhe të Amerikës së Jugut, me qëllim trafikimin e sasive të konsiderueshme të narkotikëve./CNA