E motra humbi jetën nga dhuna e burrit/ Vëllai: Nipi dëshmitar i ngjarjes, 3 fëmijët e tjerë ende nuk e dinë lajmin

30 Tetor 2023, 12:33, Kronika CNA

E motra humbi jetën nga dhuna e burrit/ Vëllai: Nipi dëshmitar i

Vëllai i Etleva Bodit, Erjon Kanolja ka treguar detaje nga ngjarja e rëndë, ku mbeti e pajetë e motra. Në një intervistë televizive, ai është shprehur se nipi i madh ka qenë dëshmitar teksa babai i tij po mbyste nënën. Ai tha se lajmin e kobshëm e ka marrë nga nipi, ndërkohë që 3 fëmijët e tjerë nuk e dinë ende që nëna e tyre ka ndërruar jetë.

“Në 27 tetor më mori në telefon nipi në 12:30 të natës dhe më tha “dajë hajde shpejt se mami ka pësuar atak kardiak dhe është ambulanca te shpia’. Mora makinën dhe shkova, por fatkeqësisht e kishin sjellë në jetë por kishte shkaktuar dëme cerebrale nga mungesa e oksigjenit. Qëndroi gati 18 orë në spital, dhe pastaj ndërroi jetë. Kur shkova te shtëpia, ishte nipi dëshmitar i ngjarjes, ka përjetuar gjithë situatën. Ai ka treguar gjithçka, motra ka qenë e mbyllur në dhomë me nipin. Policia ka telefonin e motrës, nuk ka pasur telefonatë, por ka qenë halucinacioni i tij që ka menduar se ka folur në telefon me dikë. Kur nipi ka hapur derën e dhomës, ka vendosur duart në fyt… Për momentin nipi i madh, është futur dhe në internet, ka parë që mami ka ndërruar jetë. Jam përpjekur që ta ndikoj, të bëhem krah për ta. Nipërit e tjerë akoma nuk e dinë që e ëma ka ndërruar jetë. Ata janë në shtëpinë tonë. Motra ka qenë rreth 17 vite e martuar, dhe prej 15 vitesh jetonin në Itali. Probleme kanë pasur si çdo çift, por jo probleme që të arrijnë deri këtu. Ndoshta probleme ka pasur, por i ka mbajtur për vete, ka menduar për fëmijët dhe të mos shkaktojë probleme. Shkaqet kanë qenë xhelozie besoj”, tha ai.

Ai shtoi më tej se shkak i ngjarjes së rëndë ka qenë xhelozia që burri i motrës, shfaqte ndaj kësaj të fundit. Kanolja rrëfen më tej edhe bisedën e fundit që ka zhvilluar me të motrën.

“Shkak i konfliktit ishte xhelozia. Motra nuk ka pasur telefon. Ai e kuptoi pas shumë kohe. Se po të ishte informuar ambulanca në kohë, do të ishte gjallë motra. Ai është munduar, por dëmi ishte i madh. Kishte shkaktuar dëme cerebrale te motra. Shpresë kishim, shpresonim mrekulli. Ishte dhe në dorë të fatit. Një ditë më parë kisha folur unë. Nuk kam biseduar me të tjerët. Kemi folur; si je, a je mirë? Kalo të rrimë pak më tha. Kalova dhe pimë kafe te shtëpia. Çdo gjë dukej normale. Ditën e nesërme ndodhi ngjarja. Nuk pashë asnjë lloj shqetësimi. Isha sepse ka qenë e operuar 3 ditë më parë nga apendiciti. Nuk arrinte që të çohej. Ishte në regjim shtrati. Kërkoj ndihmë për mbështetjen për fëmijët. Për motrën, çdokush që ka mundësi, që të na ndihmojë.”, tha ai.

Ngjarja e rëndë në Itali:

Burri shqiptar, Selami Bodi tentoi të mbyste gruan e tij në banesën ku jetonin në Savona të Italisë. Etleva Bodi u përpoq të mbijetonte pas qëndrimit 48 orë në spital, por nuk ia doli dot.

41-vjeçari Selami Bodi, pasi kreu e aktin e rëndë, njoftoi vetë urgjencën e spitalit, ndërkohë që gruaja e tij ishte në gjendje shumë të rëndë shëndetësore. Dhuna e 41-vjeçarit ndaj gruas së tij ndodhi ndërkohë që në banesë ishin katër fëmijët e tyre që flinin në dhomën ngjitur.

Aktualisht Selami Bodi, i arrestuar nga karabinierët e komandës provinciale të Savonës të drejtuar nga komandanti i kompanisë Fabio Truddaiu, ndodhet në burgun në Marassi, i akuzuar për vrasje. Dyshohet se shkak i ngjarjes së rëndë ka qenë xhelozia./CNA