E fundit!

09:21 Kronika

Vrasja e policit në Maliq/ Policia: I kërkuari fshihej në stan, hapi zjarr ndaj efektivëve

Policia e Korçës ka ndarë një informacion të detajuar lidh...

SHBA-ja dhe India i japin fund kohës së raporteve të ftohta

4 Shkurt 2026, 10:33, Kosova & Bota CNA

Lajmet e fundit nga Uashingtoni mund të shihen anembanë në Indi: SHBA-ja dhe India kanë arritur një marrëveshje historike tregtare. Vetëm pak kohë pas marrëveshjes me BE-në, çuditërisht shpejt, e ndoshta jo edhe rastësisht, arrihet marrëveshja mes tyre.

Marrëveshja u njoftua në mënyrën tipike nga Trump-i, në "Truth Social", platformën e Presidentit amerikan. Donald Trump njoftoi se SHBA-ja do të ulë ndjeshëm tarifat doganore për mallrat e Indisë: nga 50 për qind në 18 për qind. Një tarifë ndëshkuese e vendosur më parë prej 25 për qind do të eliminohet plotësisht, sipas burimeve nga Shtëpia e Bardhë.

SHBA-ja e kishte vendosur këtë tarifë, sepse India vazhdoi të blinte naftë dhe gaz rus të lirë pavarësisht sanksioneve perëndimore. Një tarifë shtesë, e përgjithshme, do të ulet gjithashtu nga 25 për qind në 18 për qind.

Marrëdhëniet e ftohura mes SHBA-së dhe Indisë

Marrëdhënia midis Kryeministrit të Indisë, Narendra Modi, dhe Trump-it konsiderohej se ishte ftohur ndjeshëm kohët e fundit. Tarifat drastike të SHBA-së kishin tensionuar marrëdhëniet dhe një marrëveshje dukej më pak e mundur. Por tanimë nuk flitet për një atmosferë të ftohtë në kampin amerikan.

Në vend të kësaj, ambasadori amerikan, Sergio Gor, theksoi afërsinë personale midis dy udhëheqësve në kanalin e lajmeve "NDTV" në Indi. "Gjithmonë kam thënë se Kryeministri dhe Presidenti ndajnë një miqësi të ngushtë. Disa nuk e besuan, por kjo miqësi është rritur gjatë shumë viteve, ka vazhduar dhe në fund të fundit është arsyeja pse u arrit kjo marrëveshje", tha Gor.

Ndalimi i importit si levë kundër Rusisë?

Vetëm miqësia me sa duket nuk e shpjegon marrëveshjen. Siç deklaroi Trump, Modi kishte rënë dakord më parë të mos importonte më naftë nga Rusia. Ambasadori amerikan Gor nuk deshi të komentojë detajet e marrëveshjes. Mjafton të thuhet se të dyja palët kanë rënë dakord prej kohësh për dëshirën për t'i dhënë fund luftës midis Rusisë dhe Ukrainës.

"Kryeministri gjithashtu dëshiron të shohë paqe atje, ashtu si edhe Presidenti", theksoi Gor. Prandaj, marrëveshja e arritur tani është një shkak për festim. Gor shtoi: "Për ta kuptuar më mirë, dua t'ju kujtoj se Bashkimit Europian dhe Indisë iu deshën 19 vjet për të negociuar marrëveshjen e tyre."

Megjithatë ekspertët e konsiderojnë të pamundur që India të ndërpresë menjëherë të gjitha blerjet e naftës bruto nga Rusia.

Në një reagim në platformën "X", Kryeministri Modi shprehu kënaqësinë e tij për uljet e tarifave. Ai ende nuk ka komentuar të dhënat për blerjen e naftës ruse. Ministri i Tregtisë i Indisë, Piyush Goyal, deklaroi se marrëveshja do të krijojë lidhje më të ngushta midis dy ekonomive dhe do të krijojë mundësi të papara për kompanitë indiane.

Sipas Presidentit të SHBA-së, Trump, India po angazhohet të ulë tarifat e importit për mallrat amerikane në zero dhe të importojë produkte me vlerë 500 miliardë dollarë.

India është hapur

Për ekspertin e tregut financiar Arvind Sanger, pakti tregtar ka implikime afatgjata: "Në vitet e fundit, India ka hezituar të marrë riskun e hyrjes në marrëveshje të tregtisë së lirë. Vetëm pak muaj më parë, vendi mezi ishte i pranishëm në shumë marrëveshje ndërkombëtare tregtare", shpjegon ai. Tani India është hapur dukshëm më shumë - "me BE-në, me Britaninë e Madhe dhe tani përsëri edhe me SHBA-në. Nga një perspektivë afatgjatë, kjo është me rëndësi të madhe."

Pak më shumë se një javë më parë, BE-ja dhe India arritën një marrëveshje të gjerë që eliminon tarifat për pothuajse të gjitha mallrat. Presidentja e Komisionit të BE-së, Ursula von der Leyen, e quajti atë "nënën e të gjitha marrëveshjeve". /DW