Poloni, qendra e ndihmave për Ukrainën dërgon ndihma në zonat e luftës

13 Gusht 2022, 23:06, Kosova & Bota CNA

Qendra e Ndihmave për Ukrainën

Pas fillimit të sulmit të Rusisë ndaj Ukrainës, pronarët e bizneseve ukrainase u bashkuan për të hapur një qendër ndihme në Poloni të quajtur Qendra e Ndihmave për Ukrainën. Atje, refugjatët ukrainas dhe vullnetarët ndërkombëtarë punojnë pa u lodhur për të organizuar ndihmat e dërguara nga e gjithë bota. Në mesin e vullnetarëve është edhe grupi ukrainas i muzikës rap “Kalush Orchestra”. Korrespondentja e "Zërit të Amerikës", Myroslava Gongadze, njofton nga Polonia.

Në Qendrën e Ndihmave për Ukrainën në Lublin të Polonisë punojnë rreth 150 vullnetarë çdo ditë për të organizuar dhe shpërndarë pakot e ndihmave humanitare dhe mjekësore ndërsa Rusia vazhdon sulmet e saj në Ukrainë.

Colton Smith, një vullnetar nga Kalifornia, ka ndihmuar këtu për dy muaj.

"Nuk kam pasur asnjë lidhje më të ngushtë me një konflikt ashtu si me atë në Ukrainë. I kam ndjekur zhvillimet atje që nga revolucioni i vitit 2014 dhe nuk mund të qëndroja duarkryq në Kaliforni, ndërsa Rusia filloi të sulmonte Ukrainën. M’u copëtua zemra dhe nuk mund të buzëqeshja pas fillimit të luftës", thotë vullnetari amerikan Colton Smith.

Në mesin e vullnetarëve ka edhe refugjatë ukrainas. Lufta i detyroi ata të braktisnin punën, miqtë, familjet dhe planet për të ardhmen e tyre. Tani, ata që ende janë këtu po ndihmojnë refugjatët e tjerë.

Koordinatorja Olga Rudneva thotë se bizneset ukrainase u bashkuan për të hapur qendrën e ndihmave.

"Ne jemi këtu që nga marsi. Kemi 900 vullnetarë të gatshëm për t'u bashkuar me ne në çdo kohë. Kemi 40 njerëz të tjerë çdo ditë që vijnë këtu për të mbështetur shpërndarjen e ndihmave humanitare. Pra, ne mbledhim të gjitha ndihmat humanitare të sjellura këtu sipas kategorive nga vendet europiane dhe jo të BE-së", thotë ajo.

Në bashkëpunim me qeverinë ukrainase, ata dërgojnë ndihma në Mariupol, Mykolaiv, Chernihiv, Kharkiv dhe shumë qendra të tjera ukrainase ku njerëzit kanë nevojë për ndihmë të menjëhershme. Koordinatorët thonë se deri më tani qendra ka dërguar mbi 6 mijë tonë ndihma humanitare në Ukrainë.

Këtyre përpjekjeve u janë bashkuar edhe figura të njohura, si fituesit e Eurovizionit këtë vit, grupi ukrainas të muzikës rap, “Kalush Orchestra”. Grupi bëri punë vullnetare disa orë para se të këndonte në një koncert bamirësie në Lublin për të mbështetur operacionin e ndihmave humanitare.

"Ne erdhëm në këtë qendër vullnetare më të madhe në Evropë për ta parë atë, për t’i falënderuar dhe për t’i ndihmuar ata", thotë bashkëthemeluesi i grupit “Kalush Orchestra”, Oleh Psiuk.

Të rraskapitur por të lumtur, muzikantët dhe vullnetarët së bashku kënduan këngën për refugjatët të këtij grupi të quajtur "Stefania". Grupet inkurajojnë njëri-tjetrin me fjalë pozitive për të qëndruar të fortë dhe të bashkuar për të ardhmen e Ukrainës./ VOA