E fundit!

08:16 Aktualitet

Zjarr në fushën e mbetjeve në Krujë/ Tymi toksik përfshin zonën

Fusha e mbetjeve në Krujë është përfshirë nga flakët që ng...

Osmani në Danimarkë për samitin e Komunitetit Politik Europian

1 Tetor 2025, 12:35, Kosova & Bota CNA

Presidentja e Kosovës, Vjosa Osmani, do të përfaqësojë Kosovën në samitin e udhëheqësve të Komunitetit Politik Europian, që do të mbahet në Kopenhagë të Danimarkës më 2 tetor.

Në këtë ngjarje do të marrin pjesë 45 udhëheqës europianë, përfshirë ata të institucioneve të Bashkimit Europian.

Presidenca e Kosovës tha se Osmani para samitit do të takohet me Mbretin dhe Mbretëreshën e Danimarkës si dhe do të marrë pjesë në një tryezë mbi sfidat kryesore të sigurisë me të cilat përballet Europa, përfshirë rritjen e kërcënimeve hibride dhe provokimet e paprecedenta nga Rusia ndaj shteteve anëtare të NATO-s.

"Në këtë kontekst, liderët europianë do të diskutojnë mënyrat për të shfrytëzuar momentumin politik për marrjen e vendimeve të domosdoshme, përfshirë forcimin e gatishmërisë mbrojtëse. Në kuadër të samitit, presidentja Osmani do të zhvillojë edhe takime me liderë europianë pjesëmarrës në këtë samit”, tha Presidenca e Kosovës.

Takimi i 2 tetorit do të jetë takimi i shtatë i Komunitetit Politik Europian.

“Udhëheqësit do të fokusohen se si të forcohet Ukraina, në situatën e përgjithshme të sigurisë në Europë dhe për një situatë më të sigurt gjeopolitike me të cilën përballemi”, tha Bashkimi Europian.

Sipas BE-së, gjatë samitit do të mbahen disa tryeza diskutimesh për disa aspekte të situatës së sigurisë në Europë përfshirë kërcënimet tradicionale dhe hibride, sigurinë ekonomike dhe migrimin.

BE-ja në këtë takim do të përfaqësohet nga presidenti i Këshillit Europian, Antonio Costa, dhe takimi do të bashkudhëhiqet nga kryeministri i Danimarkës, Mette Frederiksen.

Komuniteti Politik Europian është lansuar në 2022, si ide e presidentit të Francës, Emmanuel Macron, pas nisjes së pushtimit rus të Ukrainës, si një lloj forumi ndërqeveritar për diskutime politike lidhur me të ardhmen e Europës.

Në samitin e parë të mbajtur në tetor të vitit 2022 në Pragë, Macron e hodhi poshtë nocionin se ishte një lloj zëvendësimi për anëtarësimin në BE, duke ua kujtuar këtë udhëheqësve në Ballkanin Perëndimor.

Ndërkaq, nga Presidenca e Kosovës thanë se Komuniteti Politik Europian synon të forcojë lidhjet politike dhe ekonomike në gjithë Europën, të ofrojë zgjidhje për sfidat e përbashkëta dhe të thellojë bashkëpunimin ndërmjet vendeve të BE-së dhe atyre jashtë saj./REL.