web counter
LEXO PA REKLAMA!

SHKARKO APP

App Store
Google Play

Ministri i Brendshëm: Franca mund të përballet me dhunë shkaku i zgjedhjeve

24 Qershor 2024, 10:13, Kosova & Bota CNA
Ministri i Brendshëm: Franca mund të përballet me dhunë
Ministri i Brendshëm francez, Gerald Darmanin, (majtas), e shikon presidentin francez, Emmanuel Macron, gjatë një vizite në stacionin policor në Bordo, Francë, 9 qershor 2024. Burimi, AP

Franca mund të përballet me trazira civile dhe dhunë në lidhje me zgjedhjet e parakohshme, tha të hënën ministri i Brendshëm francez, Gerald Darmanin.

“Ka mundësi se do të ketë tensione tejet të mëdha”, tha Darmanin për "RTL radio", duke shtuar se autoritetet janë duke u përgatitur për një situatë “shumë të ndjeshme”, pasi votimi do të mbahet më pak se një muaj para Lojërave Olimpike Parisi 2024.

Presidenti Emmanuel Macron, i cili e tronditi kombin kur njoftoi vendimin për ta shpërndarë Parlamentin francez në fillim të këtij muaji, nuk merr pjesë në zgjedhje.

Megjithatë, këto zgjedhje perceptohen si referendum për fatin e Macron-it, i cili dikur shihej si president i aftë për t’i tejkaluar ndarjet politike, por popullariteti i tij ka rënë tani pas disa krizave politike.

“Unë ju besoj”, u tha Macron-i votuesve në një “letër drejtuar francezëve”, e cila u publikua të dielën.

Në letër, ai kërkoi ta paraqesë kampin e tij, i cili në sondazhe ngel mbrapa së djathtës ekstreme dhe pas aleancës së porsaformuar majtiste, si shpresën e fundit për stabilitet.

“Unë nuk jam i verbër: jam i vetëdijshëm për krizën demokratike”, shtoi ai.

Macron-i e përsëriti gjithashtu se do ta mbajë pozitën e presidentit derisa t’i përfundojë mandati më 2027, pavarësisht rezultatit të zgjedhjeve.

Më 9 qershor, Macron e shpërndau Parlamentin francez dhe shpalli zgjedhje të parakohshme, pas fitores së madhe të partisë së të djathtës ekstreme në zgjedhjet për Parlamentin Evropian.

Franca do të mbajë zgjedhje të parakohshme parlamentare më 30 qershor dhe 7 korrik.

Sondazhet sugjerojnë se ekstremi i djathtë mund të fitojë./ REL





Lajmet e fundit nga