web counter
LEXO PA REKLAMA!

SHKARKO APP

App Store
Google Play

Kurti: Investimet në armatim janë rritur për 191%

8 Tetor 2023, 17:29, Kosova & Bota CNA

Kurti: Investimet në armatim janë rritur për 191%

Kosova ka rritur investimet në armatim me 191% gjatë qeverisjes së Albin Kurtit.

Këto shifra i ka bërë të ditur vetë Kurti, i cili njofton në rrjetet sociale se në 2 vite e gjysmë është dyfishuar buxheti për Forcën e Sigurisë.

Ai deklaron me anë të një statusi në rrjetet sociale se gjithashtu janë rekrutuar rreth 2000 ushtarë të rinj.

“Dy vjet e gjysmë vëmendje dhe investim për ushtrinë.

Ministrisë së Mbrojtës iu ndanë 100 milionë euro buxhet për herë të parë në vitin 2021. Prej atëherë, minimumi është aq, kurse tavani sa vjen e ngritet. Për vitin 2023, buxheti për ushtrinë është 141 milionë euro, më shumë se dyfishim krahasuar me kohën kur morëm në drejtim qeverinë.

Kemi rekrutuar 1852 ushtarë të rinj, duke rritur numrin e përgjithshëm të ushtarëve për më shumë se 2/3. Ushtria jonë sot është më profesionale dhe më e përgatitur sepse gjatë kësaj periudhe, 3325 ushtarakë kanë përfunduar trajnime profesionale jashtë vendit. Ata janë të pajisur më mirë se asnjëherë më parë, sepse investimet në armatim janë rritur për 191%. Arsenalit tonë ushtarak, ia shtuam dronët e mirënjohur luftarak Bayraktar”, shkruan ai.

Kurti: Investimet në armatim janë rritur për 191%

Më tej, kryeministri i Kosovës përmend edhe marrëveshjet e nënshkruara me shtete të tjera.

“Hoqëm kufizimin në numër të Forcës së Sigurisë së Kosovës dhe e hapëm atë për çdo të re e të ri deri në moshën 25 vjeç, ndërkaq lëndën "Edukim në Siguri’’ e bëmë pjesë të kurrikulave shkollore për nxënësit e ciklit të mesëm të lartë.

Në vitin 2021, Forca e Sigurisë së Kosovës, bashkëzbarkoi me ushtrinë amerikane në misionin e saj të parë paqeruajtës në Kuvajt. Për të vazhduar pastaj një vit pas me misionin bashkëzbarkues me ushtrinë britanike në ishujt Falkland. Kurse në fillim të këtij viti dëshmoi para botës përgatitjet dhe aftësitë e saja në misione të kërkim-shpëtimit kur në Turqi shpëtoi katër jetë njerëzish nga rrënojat e tërmetit shkatërrues atje.

Përmes marrëveshjeve të nënshkruara të bashkëpunimit me Mbretërinë e Bashkuar, Shqipërinë, Letoninë, Malin e Zi, Maqedoninë e Veriut dhe Kroacinë, gjatë këtyre dy vjet e gjysmë qeverisje, dhe plot tjera që janë drejt finalizimit, kemi thelluar edhe më tej raportet me partnerë tanë strategjikë. E në Defender Europe 21 dhe 23 u rreshtuam krah për krah me aleatët tanë në ndërmarrjen më të madhe të ushtrimeve ushtarake në kontinentin e Evropës që prej përfundimit të Luftës së Dytë Botërore.

Me Forcën e Sigurisë, të sigurtë në mbrojtje të Republikës”, nënvizon Kurti./ CNA





Lajmet e fundit nga