web counter
LEXO PA REKLAMA!

SHKARKO APP

App Store
Google Play

Identifikimi përmes testimit gjenetik/ Konfirmohet hibridi i parë ujk-qen në Greqi

11 Tetor 2025, 17:30, Kosova & Bota CNA

Identifikimi përmes testimit gjenetik/ Konfirmohet hibridi i parë

Në Greqi është identifikuar përmes testimit gjenetik hibridi i parë i konfirmuar ujk-qen, sipas studiuesve të Universitetit ‘Aristoteli’ të Selanikut.

Pedagogia e Biologjisë, Nikoletta Karaiskou njoftoi se ekipi i saj konfirmoi praninë e hibridit duke përdorur metoda të përparuara gjenetike. Zbulimi u bë si pjesë e një iniciative më të gjerë kërkimore, të kryer në bashkëpunim me organizatën mjedisore Kallisto në kuadër të një programi evropian që synon të masë shkallën e hibridizimit ujk-qen në Greqi.

“Ne kemi përfunduar një studim të 50 mostrave nga rajoni i Maqedonisë Qendrore, ku fenomeni i hibridizimit duket veçanërisht intensiv. Në total, ne analizuam rreth 200 mostra nga e gjithë Greqia në bashkëpunim me Institutin Henkel në Frankfurt”,- tha Karaiskou.

Karaiskou vuri në dukje se ndërsa hibridizimi është një proces natyror që mund të çojë në shfaqjen e specieve të reja, aktivitetet njerëzore mund ta intensifikojnë atë, duke kërcënuar potencialisht popullatat e egra.

"Çështja lind kur ndodh për shkak të ndërhyrjeve antropogjene, atëherë mund të ketë ndikime negative për një specie”,-tha studiuesja.

Media e greke ‘Kathimerini’ shkruan se gjetjet vijnë mes shqetësimeve në rritje në zonën e Kilkisit, në Greqinë veriore, ku autoritetet lokale dhe fermerët kanë raportuar incidente në rritje të sulmeve ndaj bagëtive nga ata që besohet të jenë hibridë.

“Banorët i shohin vazhdimisht ata jashtë shtëpive dhe në fushat e tyre. Këto hibridë nuk jetojnë vetëm në pyje ose male, ata u afrohen fshatrave, madje hyjnë edhe në to. Ata nuk kanë frikë”,-tha një fermer.

Autoritetet tani po e monitorojnë situatën nga afër dhe në mënyra më të shpeshta në zonat rurale greke./CNA





Lajmet e fundit nga