Gjukanoviç: Mali i Zi është sërish në udhëkryq, mund të shkojë drejt Europës apo nacionalizmit ballkanik

19 Maj 2023, 14:33, Kosova & Bota CNA

Gjukanoviç: Mali i Zi është sërish në udhëkryq,

Presidenti në largim i Malit të Zi, Milo Gjukanoviç, tha sot në Cetinje se "askush nuk mund ta kundërshtojë rëndësinë historike të rezultateve të arritura gjatë qeverisjes të tij".

Këtë e tha Gjukanoviç në konferencën për media, të mbajtur në Cetinje.

Gjithçka e bërë në vitet e kaluara, theksoi ai, është legjitimimi i Malit të Zi modern. Ai tha se është e qartë se çdo ndryshim politik nuk do të thotë ndryshim për mirë.

“Mali i Zi ka treguar gatishmëri për ndryshime që flasin për emancipimin e shtetit”, deklaroi Gjukanoviç, i cili është edhe ish-udhëheqësi i DPS-së me të cilën e drejtoi Malin e Zi për më shumë se tri dekada. Ai do të zëvendësohet në postin e presidentit nga Jakov Milatoviç, i cili do të inaugurohet nesër në Kuvendin e Malit të Zi në Podgoricë.

Gjukanoviç tha se paqja dhe harmonia multietnike u ruajtën në Mal të Zi dhe se në vitet 1990 vendi u kursye nga shkatërrimi gjatë fushatës së NATO-s.

“Shtet i restauruar në mënyrë paqësore dhe i njohur ndërkombëtarisht, anëtar i NATO-s, në hollin e Bashkimit Evropian, ekonomia më e zhvilluar në Ballkanin Perëndimor. Janë zbatuar projektet e tunelit të Sozinës, Lushticës, parqeve me erë... E gjithë kjo është identifikimi i Malit të Zi”, tha Gjukanoviç.

“Në kohën e dramës së luftës jugosllave u zgjodh paqja dhe stabiliteti. Referendumi nuk ishte akt i rivendosjes së shtetësisë që na u mohua, as një festë demokratike. Ai ishte një shprehje e vetëbesimit në rritje të qytetarëve dhe besim në aftësitë e veta. Pas kësaj u bë një kthesë drejt rrethit kulturor evropian, nuk ishte një ndërmarrje e thjeshtë", tha Gjukanoviç.

“Kjo nuk është një punë e mbaruar në mandatin e një qeverie dhe as nuk mund të përfundojë. Vendi ynë është ende në fazat e hershme të procesit të emancipimit”, tha ndër të tjera ai.

Ai theksoi se Mali i Zi ka nevojë dëshpërimisht për një qeveri të qëndrueshme, kompetente, patriotike, e cila do të afirmojë shtetin civil dhe demokracinë multietnike dhe do të arrijë anëtarësimin në BE.

“Zgjedhjet e jashtëzakonshme janë shansi i parë i madh dhe shpresa e madhe, sepse Mali i Zi është sërish në një udhëkryq strategjik, nga i cili mund të kthehet në Evropë ose në nacionalizmin ballkanik”, tha Gjukanoviç./ CNA.al