web counter
LEXO PA REKLAMA!

SHKARKO APP

App Store
Google Play

E fundit!

x

Demonstrata të dhunshme dhe kaotike në Torino/ Meloni: Protestuesit vepruan si armiq të shtetit

31 Janar 2026, 21:56, Kosova & Bota CNA

Demonstrata të dhunshme dhe kaotike në Torino/ Meloni: Protestuesit

Protesta të dhunshme dhe kaotike janë zhvilluar ditën e sotme në Torino të Italisë. Demonstratat ku morën pjesë mijëra persona nga gjithë Italia dhe jo vetëm erdhën pasi disa ditë më parë, policia evakuoi dhe bllokoi qendrën sociale Askatasuna, një objekt që funksiononte si një hapësirë kulturore, sociale dhe politike për pothuajse 30 vjet.

Protestuesit hodhën fishekzjarre dhe koktejl molotov ndaj kordonit policor, ndërsa efektivët iu kundërpërgjigjën me gaz lotsjellës. Gjatë tubimit, u shkulën dritat e rrugëve, u dogjën kosha mbeturinash dhe gjithashtu një automjet i blinduar policie.

Sipas mediave italiane, njëmbëdhjetë oficerë mbetën të plagosur, ku njëri prej tyre, u rrethua dhe u godit brutalisht nga një grup protestuesish të maskuar. Lidhur me demonstratat ka reaguar edhe kryeministrja italiane, Giorgia Meloni, ku i cilësoi protestuesit si “armiq të shtetit”.

"Ajo që ndodhi sot në Torino, gjatë marshimit të protestuesve kundër dëbimit të ndërtesës Askatasuna, është serioze dhe e papranueshme. Një dëbim legjitim i një ndërtese të zënë në mënyrë të paligjshme u përdor si pretekst për të shpërthyer dhunë, zjarrvënie, bomba zjarri dhe sulme të organizuara, madje duke sulmuar edhe një automjet të blinduar policie. Imazhet e oficerit të sulmuar flasin vetë: nuk kemi të bëjmë me protestues, por me individë që veprojnë si armiq të shtetit. Ata që paguan çmimin ishin policia, e detyruar të përballet me luftë të vërtetë urbane, dhe disa gazetarë, të sulmuar gjatë kryerjes së punës së tyre. Solidariteti im i plotë shkon për ta, së bashku me atë të qytetarëve të plagosur, të cilët paguan çmimin e dhunës së verbër dhe të qëllimshme”, thuhet në reagimin e Melonit.

Protestuesve iu bashkuan sindikata bazë, shoqata, aktivistë nga qendrat sociale nga e gjithë Italia dhe më gjerë, dhe madje disa politikanë, përfshirë deputetin e AVS, Marco Grimaldi. /CNA





Lajmet e fundit nga