web counter
LEXO PA REKLAMA!

SHKARKO APP

App Store
Google Play

E fundit!

x

Sylvinho: Shqipëri me 100 km/orë, por nesër nuk do shihni ekipin tim

2023-06-16 16:55:25, Sport CNA

Sylvinho ka dalë në konferencën e zakonshme për shtyp para ndeshjes së Shqipërisë kundër Moldavisë. Trajneri i kombëtares shqiptare analizoi atë që kishte ndodhur përgjatë këtyre ditëve për përgatitjet e kuqezinjve tanë. Në fjalën e tij përpara gazetarëve, tekniku brazilian deklaroi:

“Grumbullimi ka qenë i gjatë. Ky lloj grumbullimi ka pasur vështirësitë e veta pasi lojtarët nuk kanë qenë nga fillimi. Përgatitemi prej 7-8 ditësh me grupin e plotë dhe me intensitet të plotë. Është puna jonë që t’i menaxhojmë lojtarët si duhet. Tani i njohim pak më mirë dhe kjo do të na ndihmojë. Jam i kënaqur nga impenjimi i futbollistëve. Është puna jonë tani që të bëjmë menaxhimin e duhur të ndeshjes.

Presioni? Jemi mësuar me presionin. Nuk na bën shumë përshtypje. Kemi përpara 7 finale. Nesër do të luajmë finalen e parë. Jemi të gjithë shumë të karikuar. Luajmë në shtëpi. Presim të kemi një stadium plot. Do të jetë ndihmesë e madhe dhe prezenca e tifozëve në stadium. Në momentin e fundit do të vendos për formacionin. E rëndësishme për mua është që skuadra të ketë ekuilibër për mua. Kemi një grup që do të luajë me gjithë zemër në këtë ndeshje.

Çelësi i suksesit? Niveli i përqëndrimit dhe i fokusit është i lartë në këtë moment. Për mua nuk ka ekipe të vogla. E theksoj sërish që kemi 7 finale përpara dhe e para është nesër. Unë jam i bindur që skuadra ime do të bëjë një lojë të fortë. Mendoj që Shqipëria është gati për të marrë maksimumin në këtë sfidë.

Formacioni? Jam i bindur për lojtarët që do të hedh në fushë. Nuk ka rëndësi stërvitja e sotme në këtë aspekt.

Rikthimi i lojtarëve të dëmtuar? Sadiku është lojtar simbol i kombëtares shqiptare. Është shumë i aftë para portës. E di shumë mirë se çfarë mund t’i japë kuqezinjve. E shqetëson me të vërtetë ekipin kombëtar. Unë që kur bëra listën, kam folur me të. Nëse do të më duhet për 20 apo 30 minuta, unë jam i bindur që ai mund të na japë një dorë në këtë sfidë.

Lojtarët që mungonin kundër Polonisë, duhet të mësohen me mënyrën tonë të lojës. Duhet të fiksojnë konceptet që ne kemi për mënyrën se si duhet të luajmë. Kurse ata që ishin me Poloninë e kanë më të thjeshtë. Sigurisht që këtë herë kishim disa lojtarë të rinj. Për fatin e mirë rikthehen Gjimshiti dhe Ismajli. Më pëlqen shumë edhe Muçi, për mënyrën se si e interpreton futbollin.

Shqipëria e Sylvinhos? Nesër do të shikoni ekipin kuqezi, një skuadër që luan shumë fort në fushën e lojës. Një skuadër që luan me 100 km/h. Unë e kam pasion shumë këtë punë. Unë jam i bindur që do të japin zemrën në fushë.

Sfidë vendimtare për kualifikimin? Të gjitha ndeshjet janë të rëndësishme. Të gjitha sfidat janë si një finale. Nuk ka kohë për të humbur në turne të tillë. Lojtarët e kanë të qartë dhe e dijnë shumë mirë objektin kryesor. Më e rëndësishmja për momentin është sfida me Moldavinë.

Lojtarët dhe portieri i 11-shes? Ka qenë e vështirë për të menaxhuar këtë lloj grumbullimi. Portierët janë në nivel të barabartë. Nesër do të mësojmë kë do të vendosim titullar. Një pjesë e kanë mbyllur shpejt me skuadrat e tyre, të tjerë jo. Por, është puna jonë t’i menaxhojmë situatat si duhet. Jam i bindur që ekipi është gati. Nesër do të zbresim në fushë për të bërë një ndeshje shumë të bukur. Moldavia që kam parë unë, është ekip me lojtarë të rinj. E interpreton futbollin në mënyrë të mirë. Ka lojtarë shumë të talentuar. Sigurisht që është një ndeshje shumë e vështirë për ne. Kemi shansin të zbresim në fushë dhe t’ia arrijmë qëllimit tonë.

Fusha e Air Albania? Nesër do të zbresim në fushën e stadiumit përballë 20 mijë tifozëve. Ne pamë fushën para 2 ditëve. Fusha nuk është në gjendje të keqe. E rëndësishme për mua është të mos kemi justifikime. Kam folur dhe me lojtarët e do të bëjmë maksimumin”, tha ai.

Ndeshja Shqipëri – Moldavi është programuar të zhvillohet nesër (e shtunë) në orën 20:45, në stadiumin “Air Albania”.





Lajmet e fundit nga