web counter
LEXO PA REKLAMA!

SHKARKO APP

App Store
Google Play

Spikat derbi i kryeqytetit, zbulohet kalendari i Superiores për javën e 23-të

2024-02-05 14:30:00, Sport CNA

Spikat derbi i kryeqytetit, zbulohet kalendari i Superiores për javën

Skuadrat do të vazhdojnë intensivisht përgatitjet për duelet e javës së 23-të të Superiores. Do të luhet në fundjavë, të shtunë dhe të diel, me ekipet që do të kërkojnë 3 pikët për objektivat e tyre.

Duele dhe takime mjaft interesante janë në program, teksa në këtë javë spikat derbi mes Dinamos dhe Partizanit. Siparin e kësaj jave do ta “ngrejë” dueli mes Egnatias dhe Laçit. Kjo përballje do të luhet ditën e shtunë në orën 13:30 në “Egnatia Arena”.

Rrogozhinasit vijnë si kryesues dhe pas barazimit me Partizanin ndaj kurbinasve do të luajnë vetëm për rezultat pozitiv, ndërsa nga ana tjetër bardhezinjtë gjithashtu morën 1 pikë ndaj Vllazninë dhe do të tentojnë fitoren në transfertë.

Në orën 17:00 do të luhet derbi mes Dinamos dhe Partizanit. Në “Niko Dovana” skuadra e Dritan Mehmetit pas dy fitoreve radhas synon vazhdimësinë. Ndërkohë Orges Shehi nuk dëshiron më hapa fals në garën për kreun e klasifikimit.

Paralelisht me derbin do të luhet edhe në Shkodër. Vllaznia do të presë Teutën në “Loro Boriçi”. Shkodranët pas dy barazimeve radhazi synojnë rikthimin te fitorja, ndërsa “djemtë e detit” pas fitores me Skënderbeun shkojnë me moralin lart në Shkodër.

Të dielën do të luhen dy sfidat e tjera. Fillimisht Tirana – Erzeni do të përplasin mes tyre “brinjët” në orën 13:30 për llogaritë e javës së 23-të. Bardheblutë janë më të motivuar se kurrë për të vazhduar me fitoren, ndërsa shijakasit pas 3 humbvjeve radhazi synojnë të bëjnë kthesën në kampionat.

Ndërkohë në orën 17:00 Skënderbeu do të presë Kukësin në Korçë. Vendasit vijnë pas humbjes me Teutën dhe në shtëpi nuk u lejohen më hapa fals, teksa përballë do të kenë verilindorët që prej më shumë se 12 javësh nuk e njohin shijen e fitores. Emiliano Çela pas ndeshjes me Tiranën do të kërkojë të “shfryjë” nervat te korçarët për të siguruar edhe 3 pikët e para në krye të Kukësit.





Lajmet e fundit nga