Marko Radas: Ndihem keq, Skënderbeu nuk e ka aty vendin. Takaj nuk e pranon dot këtë

2022-10-27 16:52:00, Sport CNA

Marko Radas: Ndihem keq, Skënderbeu nuk e ka aty vendin. Takaj nuk e pranon

Skënderbeu që dominoi për një dekadë futbollin shqiptar, sot është pjesë e Kategorisë së Parë. Vetë klubi dhe tifozët ende nuk janë mësuar me këtë realitet të ri. Edhe pse kanë kaluar disa muaj nga drama, dhemb ende. Ata që ndoshta e ndiejnë më shumë janë lojtarët që bënë historinë me këtë fanellë dhe kanë qenë pjesë e asaj periudhë të artë të bardhekuqve.

Një ndër ta është edhe Marko Radas, i cili ka mbajtur një peshë jo të vogël në këtë skuadër dhe ka shijuar edhe eksperiencat historike në arenën europiane. Ai u “shqiptarizua” dhe domosdo, pasi luajti plot 8 vite në Korçë. Edhe pse u bë vite që është kthyer në Kroaci, hera-herës e kthen kokën pas. Në një prononcim ekskluziv për “Panorama Sport”, tregon lidhjen me Skënderbeun dhe ndjesinë e përjetuar kur korçarët zbritën në të Parën.

“Unë e kam thënë shpesh dhe do të vijoj ta përsëris, se Skënderbeu ka zëne një vend mjaft të veçantë tek unë dhe normalisht është një ndjenjë që nuk do të shuhet. Pas rënies një kategori më poshtë, jam informuar vetëm sa u takon rezultateve edhe për shkak se ndeshjet e këtij kompeticioni nuk transmetohen. Por kam ndjekur çdo takim të luajtur në sezonin e kaluar dhe të them të drejtën jam ndier keq, si të isha unë që bija një kategori më poshtë. Ky Skënderbe nuk e ka vendin këtu dhe të bën të ndihesh keq, gati një dramë. Ky është i vetmi zhgënjim dhe ndjesi negative që më shqetëson. Shpresoj që të rikthehen shpejt”, theksoi fillimisht Marko Radas, që pikërisht dje festoi ditëlindjen e 38-të.

Marko Radas: Ndihem keq, Skënderbeu nuk e ka aty vendin. Takaj nuk e pranon

RINGRITJA – Më pas, kroati u ndal edhe te shpresat dhe dëshirat për sezonin aktual duke besuar te ringritja. “E di që është në vendin e katërt tani dhe nuk po bën aq mirë sa e prisnim, por duhet të kemi parasysh se një ekip i tillë kërkon kohë përshtatjeje kur bie një kategori më poshtë. Për këtë ka nevojë Skënderbeu. Unë jam i bindur se edhe Takaj nuk e pranon dot faktin që po luan në këto nivele. Unë e njoh mirë filozofinë e presidentit dhe e di se çfarë është në gjendje të bëjë për t’i rikthyer lavdinë ekipit, gjë që e ka shprehur me kohë.

Besoj se këtë sezon kanë për ta kaluar shpejt dhe ngjitja do të vijë menjëherë. Gjithsesi, mbetet një mision i vështirë për shkak të terreneve dhe kushteve të fushave, gjë të cilën Skënderbeu nuk është i mësuar dhe nuk do ta ketë problem. Por ajo që unë them është se befasi të tilla si në javën e fundit me Besëlidhjen në Shtëpi duhen shmangur nëse synojnë ngjitjen e menjëhershme”, përfundoi Marko Radas, që tashmë ka nisur një tjetër rrugë. Pranë futbollit gjithnjë, por si trajner tashmë. Ai është pjesë e ekipeve të moshave të vogla te Dinamo e Zagrebit.