Si mund të eleminojmë ndrojtjen e fëmijëve në një mjedis të panjohur

2022-12-18 22:27:00, Sociale Lira Gjika

Si mund të eleminojmë ndrojtjen e fëmijëve në një

Foto ilustruese

Besoj se mund të rakordojmë, se mënyra më e mirë për të eleminuar ndrojtjen kur ndodhesh në një mjedis të panjohur është loja.

Të gjithë kemi provuar të tilla eksperienca në plazhe, lojërat me top, në festa, të kërcyerit dhe të kënduarit. Sa shpejt miqësohesh, si çlirohesh nga ndrojtja aq sa habitesh edhe vetë.

Pra, loja ka një veti, ajo krijon brenda nesh një mjedis shumë të rehatshëm me veten dhe me të tjerët, duke neutralizuar pasigurinë. Edhe tek fëmijët, loja krijon të njëjtin efekt, madje është forma më e mirë e komunikimit.

Sa vjen në këtë botë nëna e pret me buzëqeshjet, qeshjet e gëzuara dhe plot dhimbsuri duke i prekur duart, fytyrën dhe duke e thërritur në emër apo djali/vajza ime. Kjo është njohja e parë dhe loja e parë ndërmjet tyre, e cila do bëhet modeli i fëmijës për të njohur veten, mjedisin dhe gjithçka që e rrethon.

Jo vetëm nëna, por edhe të rriturit e tjerë kur komunikojnë me foshnjën, gjëja e parë që bëjnë është buzëqeshja dhe loja me të. Regullojnë zërin, e prekin me përkëdheli, i lëvizin duart përpara fytyrës duke i kërcitur, si e si ta bëjnë foshnjën të reagojë dhe tu përgjigjet me të qeshurën magjepsëse që vetëm fëmija mund ta japë.

Kështu, loja është mënyra e vetme e komunikimit të të rriturit me foshnjën. Kjo është arsyeja pse në fëmijëri loja merr vlera të karakterit vital dhe bëhet mënyra e vetme për të eksploruar e komunikuar. Fëmija vetëm kësaj mënyre mund t’i përgjigjet se vetëm këtë mënyrë njeh.

Loja krijon mundësi për realizimin e perceptimit të kufijve kohë dhe hapësirë dhe për shfrytëzimin optimal të tyre.

Loja bëhet e këndshme dhe fëmija përfshihet në lojë vetëm kur është i sigurt se nuk është vetëm dhe ka vëmëndjen e të rriturit. Mos e harroni se fëmija mund të jetë me veten vetëm në prezencë të dikujt tjetër. Loja aktivizon tek fëmija, energjitë që kanalizohen më pas drejt eksplorimit dhe njohjes, duke i provokuar kënaqësinë që është i zoti.

Kujtojmë tre konstantet e njeriut të emërtuara me të drejtë nga Piage-ja: nevojat fizike, afektive dhe intelektuale, të cilat mjafton të ngacmohen dhe ato menjëherë aktivizohen, pavarësisht moshës.

Në lojë, kufijtë dhe kufizimet mësohen në mënyrë të natyrshme dhe të vetvetishme.