26 orë seancë mes tensionesh dhe sherresh/ Vendimet që u morën

2022-12-23 10:43:00, Politikë CNA

26 orë seancë mes tensionesh dhe sherresh/ Vendimet që u

Pas një seance maratonë me shumë tensioned he debate mbrëmjen e djeshme Kuvendi ka votuar për anëtarin e ri të Gjykatës Kushtetuese.

Pas dy ditësh diskutime në Kuvend, Marjana Semini u zgjodh anëtarja më e re e Gjykatës Kushtetuese. Semini mori 58 vota, Ardian Dvorani 14 vota, ndërsa Arta Vorpsi 2 vota.

Duke qenë se asnjë nga kandidatët nuk plotësoi 84 votat e mjaftueshme, rrjedhimisht kandidatja e renditur e para mori postin e anëtares së Gjykatës Kushtetuese.

Sakaq një tjetër vendim i rëndësishëm që u mor mbrëmë në orët e vona në Kuvend ishte zgjedhja e Kryetarit të Autoritetit për Informimin mbi Dokumentet e Ish-Sigurimit të Shtetit.

Në krye të Autoritetit të Dosjeve u rizgjodh Gentiana Sula me 71 vota pro. 5 deputetë votuan kundër dhe një abstenoi.

Votimi u bë pas një seance maratonë që u shoqërua me debate dhe përplasje të shumta mes deputetëve.

Një tjetër çështje për të cilët pati debate të forta ishte zgjedhja e Avokatit të Popullit.

Votimi u shty për në vitin 2023.

Pas seancës maratonë që zgjati dy ditë, mazhoranca rrëzoi kandidatët e opozitës.

Avokati i "Babales" dhe i inceneratorëve, Ledio Braho mori vetëm 3 vota pro, ndërsa Altin Goxhaj që mbështetej nga deputetët e grupit të Sali Berishës mori 70 vota kundër.

Duke qenë se asnjëri nga kandidatët nuk arriti 84 vota, votimi u shty për vitin tjetër.

Siç edhe kishte paralajmëruar, opozita bojkotoi votimin, ndërsa në sallë qëndruan tre deputetët e Partisë së Lirisë, Monika Kryemadhi, Petrit Vasili dhe Erisa Xhixho./CNA.al