Përplasje në PD-në e vulës/ Kolegji i Kryetarëve kërkon zgjedhje para riorganizimit të bazës

2023-06-05 21:46:00, Politikë CNA

Përplasje në PD-në e vulës/ Kolegji i Kryetarëve

Kolegji i Kryetarëve të Partisë Demokratike të vulës ka dalë me një deklaratë për mediat pas mbledhjes që zhvilloi sot.

Kreu i grupit, Gazment Bardhi tha se lideri i ri duhet të zgjidhet pas riorganizimit të bazës, por Kolegji i Kryetarëve kërkon të kundërtën.

Në deklaratë thuhet se procesi për zgjedhjen e kryetarit të pëfundojë brenda datës 15 Korrik të këtij viti dhe nuk duhet që të vazhdohet pritja me një parti pa kryetar.

Deklarata e plotë:

Kolegji i Kryetarëve të Partisë Demokratike, i mbledhur më 5 Qershor 2023, pasi e dëgjoi dhe e diskutoi, miratoi me unanimitet deklaratën si më poshtë:

Deklaratë e Kolegjit të Kryetarëve të Partisë Demokratike

Partia Demokratike që prej marsit 2022 ka bërë përpjekje të vazhdueshme, por pa rezultat për bashkimin e demokratëve,

- dorëheqja e kryetarit më qëllim për ti hapur rrugë ti hapur rrugë bashkimit, gjë që nuk ndodhi,

- kërkesa për organizimin e zgjedhjeve të përbashkëta të cilat u refuzuan,

- kërkesa për përzgjedhjen e kandidatëve në zgjedhjet e 14 majit që u refuzua dhe u vazhdua me procese të njëanshme,

- propozimin për daljen me një kandidat të përbashkët për zgjedhjet vendore të 14 majit duke pranuar kandidatët e primareve

Të gjitha këto përpjekje u refuzuan.

Eshtë humbur një vit në pritje të bashkimit, por pa rezultat dhe kjo ka ndikuar në dëmtimin dhe dobësimin e Partisë Demokratike.

Drejtuesit e Partisë Demokratike nga seksionet, grupseksionet, kryetarët e degëve kanë punuar me vetmohim për të mos lejuar asimilimin Partisë Demokratike apo asgjesimin e saj.

Ne jemi të vendosur që Partia Demokratike të vazhdojë të jetë një parti aleate e SHBA, Britanise se Madhe dhe BE, të shndërrohet në një alternativë dhe shpres? për shqiptarët në zgjedhjet e përgjithshme të vitit 2025.

Për këto arsye, çdo ditë e humbur nuk i shërben as Partisë Demokratike, as demokratëve.

Partia Demokratike duhet pa asnjë vonesë të zgjedhë kryetarin e saj dhe të nisë organizimin dhe përzgjedhjen, të ekipeve që do ta drejtojnë këtë parti drejt zgjedhjeve të ardhshme.

Partia Demokratike nuk mund të vazhdojë të qëndrojë më gjatë pa kryetar. PD ka humbur kohë në pritje, ndërkohë që nuk ka asnjë reflektim nga pala tjetër, as pas rezultatit të zgjedhjeve të 14 majit.

Procesi për zgjedhjen e kryetarit të pëfundojë brenda datës 15 Korrik 2023.

Nëse vazhdojmë të rrimë në pritje, atëherë kjo i shërben vetëm projektit te kundërshtarëve tanë politikë.

Nuk duhet humbur më asnjë ditë kohë për organizimin e PD, zgjedhjen e drejtuesve dhe shndërrimit të Partisë Demokratike në forcën politike që kërkojnë sot shqiptarët./ CNA.al