web counter
LEXO PA REKLAMA!

SHKARKO APP

App Store
Google Play

E fundit!

x

Zbardhet vendimi i Gjykatës së Lartë/ Jeton Lami nuk nxirret nga qelia pasi shoqëroi Ervis Martinajn

2023-03-05 16:05:00, Kronika CNA

Zbardhet vendimi i Gjykatës së Lartë/ Jeton Lami nuk nxirret nga

Gjykata e Lartë la në burg ish-agjentin e Forcave Operacionale, Jeton Lami, i cili akuzohet se ka bashkëpunuar me të shumëkërkuarin Ervis Martinaj, ky i fundit i zhdukur që prej gushtit të 2022-shit.

Ditën e sotme është zbardhur vendimi i 7 shkurtit që rrëzonte rekursin e Lamit për zbutje të masës së sigurimit.

Ndonëse ai pretendonte se izolimi në qeli mund t’i rrezikonte jetën për shkak të profesionit, Gjykata e Lartë e ka parë si të panevojshme lënien e lirë të ish-policit.

“19. Kolegji Penal vlerëson se asnjë nga pretendimet e ngritura në rekurs nuk i referohet shkaqeve të rekursit të parashikuara nga 432 i Kodit të Procedurës Penale. Pjesa e pretendimeve në rekurs që ngre çështje të vlerësimit të provave del jashtë juridiksionit ekskluzivisht ligjor të Gjykatës së Lartë.

Në të gjitha rastet kur rekursi nuk i përmbahet shkaqeve të përcaktuara nga neni 432/1 i Kodit të Procedurës Penale, Kolegji Penal vendos mospranimin e rekursit.

Qëndrimi që mban Kolegji për rastin në shqyrtim, bazohet edhe në jurisprudencën e konsoliduar të Kolegjit Penal të Gjykatës së Lartë, që referon në jurisprudencën e Gjykatës Kushtetuese dhe të Gjykatës Evropiane për të Drejtat e Njeriut, sipas të cilave shkaqet e parashtruara në rekurs që rezultojnë haptazi të pabazuara vlerësohen si të papranueshme për pranimin e rekursit.

Kolegji Penal vlerëson se asnjë nga pretendimet e parashtruara nga kërkuesi nuk i referohet shkaqeve të rekursit të parashikuara nga neni 432 i K.Pr.Penale.

Kolegji vlerëson se Gjykata e Apelit Tiranë ka arsyetuar vendimmarrjen e saj dhe nuk ka shkaqe për cënimin e saj.

Gjithashtu Kolegji nuk konstaton shkelje të ligjit material apo procedural penal prej Gjykatës së Apelit.

Sa më sipër, Kolegji Penal i Gjykatës së Lartë, vlerëson se rekursi i paraqitur nga kërkuesi Jeton Lami kundër vendimit nr. 801 datë 20.09.2022 të Gjykatës së Apelit Tiranë nuk përmban ndonjë prej shkaqeve të sipërpërmendura dhe për rrjedhojë nuk mund të pranohet”, thuhet ndër të tjera në vendim.

Kujtojmë se ish-agjenti i policisë u arrestua në 24 gusht pasi në dy momente doli nga kamerat filmike, teksa shoqëronte Ervis Martinajn, personin e kërkuar nga prokuroria e posaçme, SPAK, për akuzën e “Sigurimit të kushteve dhe mjeteve” me qëllim vrasjen e Endrit Dokles.

Por teksa SPAK-u dhe policia e kërkonin me qëllim arrestimin e tij, Martinaj është zhdukur në 8 gusht 2022. Në përpjekje për të gjurmuar të kërkuarin, policia dhe prokuroria e Laçit zbuloi se ai shoqërohej me agjentin e policisë, Jeton Lami./ CNA.al





Lajmet e fundit nga