“Mos të bënte atë që bëri andej”/ Konsullata shqiptare në Milano i mban peng patentën

2022-12-23 23:01:48, Denoncim CNA

“Mos të bënte atë që bëri andej”/

Emisioni “Stop” në Tv Klan u gjend në Durrës me qytetarin Festim Biba, të cilit i është bllokuar për 15 ditë patenta në Itali nga policia italiane. Më pas autoritetet italiane e kanë çuar patentën në konsullatën shqiptare të Milanos, ku ka mbetur prej dy muajsh. Ndërkohë qytetari është pa punë dhe i bllokuar, në një kohë, që është shofer kamioni dhe me këtë punë jeton.

Gazetarja: Zoti Biba, çfarë ju lidh juve me konsullatën tonë në Milano?

Festim Biba: Historia ime është kjo: më ndalon policia e Rovigos dhe më bllokojnë patentën. Patentën ma bllokojnë për 15 ditë. pas 15 ditësh, prefektura e Rovigos e nis në konsullatën në Milano. Por në Milano nuk më përgjigjen për patentën, asnjë datë, asnjë farë caktimi kur do ma bien. Unë jam i papunë.

Gazetarja: Cili është profesioni juaj?

Festim Biba: Profesioni im është shofer kamioni. Punoj prej 22 vjetësh vetëm me Italinë. Më 18 Tetor, policia italiane ma çon patentën në konsullatën shqiptare dhe deri më sot nuk më ka ardhur asnjë lloj përgjigjeje. I kemi çuar dhe një email 3 herë, nuk na kthejnë përgjigje.

Gazetarja: Ndërkohë çfarë po ndodh me punën? Ju punoni si privat apo jeni me ndonjë kompani?

Festim Biba: Jo, jam me një kompani. Nga kompania ime janë duke më pritur mua tani që të rifilloj punën prapë.

Gazetarja: Ndërkohë po paguhesh gjatë kësaj kohe?

Festim Biba: Jo, jam pa pagesë.

Gazetarja: Dy muaj domethënë…

Festim Biba: Jam 0 se ne i kemi me rrugë.

Gazetarja: Dhe e gjitha për kartonin e patentës.

Festim Biba: Po. Vetëm për ato.

Në një komunikim me zyrën e shtypit të Ministrisë për Europën dhe Punët e Jashtme, na thanë që dokumentet grumbullohen dhe nisen një herë në muaj drejt Shqipërisë. Por qytetarit Biba i është vonuar dy muaj dhe autoritetet shqiptare nuk japin shpjegim, por thonë, se ai nuk duhet të bënte shkelje.

“Mos të bënte atë që bëri andej”/

Zyra e Shtypit: Fola me Zyrën Konsullore dhe po e verifikojnë ata kanë ardhur materialet nga Milano apo jo. Që ta kuptosh edhe ti dhe zotëria, nuk është se vjen patenta dhe niset se ato nisen me avion, priten të bëhen grupe dokumentash dhe nisen. Deri sot nuk kanë ardhur akoma dërgesat nga konsullata, kjo që bëhet njëherë në muaj me gjithë dokumentacionin përfshirë pasaporta të skaduara, pasaporta të gjetura e me radhë që nga Milano vijnë me avion, me postë të posaçme.

Gazetarja: Po si ka mundësi që nuk kanë ardhur? Dëgjo, ti thua njëherë në muaj vijnë këto?

Zyra e Shtypit: Tani, varet nga sasia e dokumentave që nuk është se ka një rregull fiks që bëhen 1 herë në ditë, 1 herë në javë. Deri sot nuk kanë ardhur akoma dërgesat nga konsullata, kjo që bëhet njëherë në muaj me gjithë dokumentacionin. Do shkoj një vrap te konsullorja dhe po i them si është kjo procedura.

Gazetarja: Problemi është që zotëria ka 2 muaj që i është bllokuar tashmë, më kupton?

Zyra e Shtypit: Epo tashi, zotëria të mos e bënte atë që bëri andej, kaq!

Gazetarja: Nuk ka bërë asgjë andej ai se për atë punë 15 ditë ia kanë mbajtur ata. Më kupton?

Gazetarja: Doli polici e kaluar policisë konsullata.

Pas interesimit të “Stop” brenda 24 orësh erdhën nga Milano 70 patenta, përfshirë atë të zotit Festim Biba./tvklan.al